ევროპარლამენტმა 50 მილიარდი ევროს ოდენობის უკრაინის ფონდის შექმნას დაუჭირა მხარი, – ამის შესახებ ევროპარლამენტი იუწყება.
ევროპარლამენტმა მხარი დაუჭირა 2021-2027 წლების ევროკავშირის ბიუჯეტის გადასინჯვის შესახებ რეზოლუციას, რომელიც 50 მილიარდი ევროს ოდენობის სპეციალური უკრაინის ფონდის შექმნას ითვალისწინებს.
ევროპარლამენტმა 2021-2027 წლების მრავალწლიანი ფინანსური პროგრამის შუალედურ განხილვაში შესატანი ცვლილებები 393 ხმით 136-ის წინააღმდეგ დაამტკიცა. 92-მა ევროპარლამენტარმა კი, თავი შეიკავა.
დოკუმენტში ნათქვამია, რომ ბიუჯეტში შესული ცვლილებები ფოკუსირებული იქნება უკრაინის წინააღმდეგ რუსეთის აგრესიის შედეგებზე, ევროკავშირის სტრატეგიული ავტონომიისა და სუვერენიტეტის გაძლიერებასა და ევროკავშირის მიერ სხვადასხვა სახის კრიზისებზე ადეკვატური რეაგირების უზრუნველყოფაზე.
