“ეს ორი სუვერენული სახელმწიფოს საქმეა, რა შუაშია აქ აშშ?” – ზახაროვა ფრენების აღდგენაზე

87
spot_img

რუსეთის ფედერაციის საგარეო საქმეთა სამინისტროს პრესსპიკერის მარია ზახაროვას თქმით, მისთვის გაუგებარია, რატომ თვლის ვაშინგტონი, რომ ორ სახელმწიფოს შორის შეთანხმებებზე კომენტარს უნდა აკეთებდეს. ამის შესახებ ზახაროვამ რუსეთ-საქართველოს შორის პირდაპირი ფრენების აღდგენის შესახებ აშშ-ის პოზიციის შეფასებისას განაცხადა.

„ამას არ შეიძლება მიეცეს სხვა კვალიფიკაცია, გარდა სუვერენული სახელმწიფოების საშინაო საქმეებში ჩარევისა. ეს იმ ქვეყნებს შორის საჰაერო მიმოსვლაა, რომლებიც არა მხოლოდ გეოგრაფიული თვალსაზრისით არიან მეზობლები – ჩვენ ძალიან ბევრი გვაკავშირებს ისტორიულ კონტექსტში. რა შუაშია აქ აშშ, საერთოდ გაუგებარია“, – აცხადებს ზახაროვა.

ცნობისთვის, აშშ-ის სახელმწიფო დეპარტამენტის სპიკერის მოადგილემ ვედანტ პატელმა არ გამორიცხა იმის შესაძლებლობა, რომ შტატებმა სანქციები დაუწესოს კონკრეტულ ავიაკომპანიებს, თუ ისინი სანქცირებულ რუსულ თვითმფრინავებს მოემსახურებიან.

შეგახსენებთ, საქართველოს მოქალაქეებისთვის სავიზო რეჟიმის მოხსნის შემდეგ, მოსკოვიდან თბილისში პირველი პირდაპირი რეისი 19 მაისს განხორციელდა.