ჩრდილოეთ კორეამ ბალისტიკური რაკეტის ახალი მოდელი გამოცადა, – ინფორმაციას Reuters-ი სამხრეთ კორეის გაერთიანებული შტაბზე დაყრდნობით ავრცელებს.
მათივე ინფორმაციით, რაკეტამ, რომელიც ფხენიანის ახლომდებარე ტერიტორიიდან გაუშვეს, დაახლოებით, 1000 კმ მანძილი დაფარა. სამხრეთ კორეა რაკეტის გამოცდას „მძიმე პროვოკაციად აფასებს“.
ქვეყნის თავდაცვის უწყებაში აცხადებენ, რომ მჭიდრო კოორდინაციაში არიან მთავარ მოკავშირესთან, შეერთებულ შტატებთან.
განცხადება გაავრცელა თეთრმა სახლმაც, სადაც აღნიშნულია, რომ „მკაცრად გმობენ“ შორი რადიუსის ბალისტიკური რაკეტის გამოცდას.
რაკეტის გაშვებამ შეშფოთება გამოიწვია იაპონიაშიც. იაპონიის ხელისუფლებამ კუნძულ ჰოკაიდოს მოსახლეობის ევაკუაციისა და თავშესაფრებში გადასვლის განკარგულება გასცა, მაგრამ გაფრთხილება ცოტა ხნის შემდეგ გააუქმა. იაპონიის თავდაცვის მინისტრის, იასუკაზუ ჰამადას განცხადებით, რაკეტა იაპონიის ტერიტორიაზე არ ჩავარდნილა.
