აშშ-ის ეროვნული უსაფრთხოების საბჭოს სტრატეგიული კომუნიკაციების კოორდინატორმა, ჯონ კირბიმ განაცხადა, რომ აშშ არ უჭერს მხარს ისრაელ-ჰამასის კონფლიქტში ცეცხლის შეწყვეტის შესახებ არსებულ მოწოდებებს.
“ჩვენ არ მივიჩნევთ, რომ ცეცხლის შეწყვეტა ახლა სწორი პასუხია. ამ დროისთვის ჩვენ არ ვუჭერთ მხარს ცეცხლის შეწყვეტას”, – აღნიშნა თეთრი სახლის მაღალჩინოსანმა.
ჯონ კირბის თქმით, ცეცხლის შეწყვეტის ნაცვლად უნდა განიხილებოდეს ღაზაში დახმარების მისაღებად ჰუმანიტარული პაუზების დაწესება.
მისი თქმით, აშშ ესაუბრა ისრაელის მთავრობას იმის შესახებ, რომ იმ სატვირთო ავტომობილების რაოდენობა, რომლებსაც ღაზაში დახმარება შეაქვთ, ყოველდღიურად 100-მდე გაიზარდოს.
”ჩვენ ვიცით, რომ ესეც კი, რაც მნიშვნელოვანი გაუმჯობესება იქნება იმასთან შედარებით, სადაც ახლა ვიმყოფებით, საკმარისი მაინც არ იქნება,” – განაცხადა ჯონ კირბიმ.
შეგახსენებთ, ისრაელის პრემიერ-მინისტრმა, ბენიამინ ნეთანიაჰუმ გუშინ განაცხადა, რომ მოწოდება ცეცხლის შეწყვეტის შესახებ არის მოწოდება ისრაელისთვის, რომ „ჰამასს“ დანებდეს.
