ჩინეთის ინგლისურენოვან ყოველდღიური გაზეთ „გლობალ თაიმსში“ (The Global Times) დაბეჭდილია სტატია სათაურით „ვაგნერის ამბოხება: დასავლეთი სასურველს სინამდვილედ ასაღებს“ (ავტორი – ჩენ ცინცინი).
გთავაზობთ ამონარიდებს:
„ვაგნერ-ჯგუფის“ ამბოხებამ, რომელიც ბელარუსის პრეზიდენტის შუამავლობით, 24 საათში დასრულდა, რასაკვირველია, მთელი მსოფლიოს ყურადღება მიიპყრო. ზოგიერთმა დასავლელმა ანალიტიკოსმა „ვაგნერის“ შეიარაღებული გამოსვლა ვლადიმერ პუტინის ხელისუფლებისადმი მიმართულ მძიმე დარტყმად წარმოაჩინა. მათი მტკიცებით, ამ მოვლენამ რუსული სახელმწიფოს სისუსტეები გამოავლინა. ჩინელი ექსპერტები კი აღნიშნავენ, რომ რადგანაც დასავლეთი ხედავს უკრაინის არმიის კონტრშეტევის ჩიხში შესვლას, ახლა „ვაგნერის“ ამბოხების ფაქტით მანიპულირებენ და სასურველს სინამდვილედ ასაღებენ“.
საერთოდ, ჩინეთის ოფიციალური შეფასება რუსეთში მომხდარი მოვლენების მიმართ ასეთია: „ის რაც რუსეთში მოხდა, რუსეთის საშინაო საქმეს წარმოადგენს. ამავე დროს, როგორც რუსეთის მიმართ მეგობრულად განწყობილი მეზობელი და როგორც ახალი ეპოქაში რუსეთის სტრატეგიული პარტნიორი და კოორდინატორი, ჩინეთი მხარს უჭერს რუსეთს ეროვნული სტაბილურობის განმტკიცებასა და უსაფრთხოების დაცვაში“.
როგორც აღმოსავლეთ ჩინეთის პედაგოგიური უნივერსიტეტის რუსული კვლევების ცენტრის მეცნიერ-თანამშრომელი ცუი ჰენი აღნიშნავს „გლობალ თაიმსთან“ საუბარში, დასავლეთი საგულდაგულოდ ცდილობს რუსეთში ანტისამთავრობო განწყობის პროვოცირებას, რაც, საერთოდ, საკმაოდ გავრცელებულ ტაქტიკად ითვლება და ამჟამად უკრაინის ომთან არის დაკავშირებული. დასავლეთს სურს რუსეთი სუსტ სახელმწიფოდ წარმოაჩინოს, ვლადიმერ პუტინი კი უუნარო ლიდერად, მაგრამ ის, რომ ამბოხების დასრულება დროის ასეთ უმოკლეს ვადაში მოხდა, ამ ფაქტმა პირიქით – პუტინის ადმინისტრაციის ავტორიტეტი გაზარდა.
ზოგიერთი დასავლელი პოლიტიკოსი იმედოვნებდა, რომ ვლადიმერ პუტინი ქვეყანაზე კონტროლს დაკარგავდა, რუსეთი ქაოსში ჩაიძირებოდა, არმია დასუსტდებოდა და უკრაინიდან გავიდოდა. ზოგიერთი კი უფრო შორს მიდიოდა – რუსეთის დაშლას პროგნოზირებდა. მოკლედ, დასავლელმა ანალიტიკოსებმა ვაგნერის ამბოხების მნიშვნელობის გადაჭარბებულად აღიქვეს.
„სინამდვილეში ევგენი პრიგოჟინის გამოსვლა რუსეთის მთავრობის დამხობას არ ითვალისწინებდა. მან უკიდურესი და სარისკო ნაბიჯი გადადგა, რადგან იმედოვნებდა, რომ სწორედ ასეთი სახის გამოსვლით მოახერხებდა უმაღლესი მთავარსარდლის ყურადღების მიპყრობას „ვაგნერის“ პრობლემების მიმართ“, – ამბობს ვან ივეი, ჟენმინის უნივერსიტეტის პროფესორი „გლობალ თაიმსთან“ საუბარში.
და მაინც, რა თქმა უნდა, „ვაგნერელეთა“ ლიდერის ასეთი ღია გამოსვლა – კრემლისადმი დაუმორჩილებლობის ელემენტებით – რუსეთის არმიის სტაბილურობაზე და დისციპლინაზე ნეგატიურ გავლენას მოახდენს. ვლადიმერ პუტინისათვის ამბოხების შემდგომი პერიოდიც გამოცდა იქნება.
„ასეთი დრამატული მოვლენა ვლადიმერ პუტინს და რუსეთის ხელისუფლებას აიძულებს მკაფიოდ გააცნობიერონ უკრაინის ომის მნიშვნელობა. რაც უფრო მეტ ხანს გაგრძელდება ომი, მით უფრო გახშირდება მსგავსი უკმაყოფილებების გამოვლენის ფაქტები. ამიტომ არ არის გამორიცხული, რომ სამომავლოდ ვლადიმერ პუტინმა გააქტიუროს ძალისხმევა კონფლიქტის დასასრულებლად, რათა თავიდან აირიდოს ანალოგიური რისკები. ალბათ, შეეცდება კიდევ უფრო გააფართოოს და განამტკიცოს კავშირები [მისთვის მეტ-ნაკლებად საიმედო] მეზობლებთან“, – ამბობს ვან ივეი.
