26 მაისი, ყველაზე ნათელი, ყველაზე ქართული, ყველაზე კეთილშობილი დღესასწაული საქართველოში, – ამის შესახებ სოციალურ ქსელში ექსპერტი საერთაშორისო საკითხებში, ზურაბ მარშანია წერს.
მისი თქმით, ეს დღე საქართველოს ეროვნული დამოუკიდებლობის აღდგენისა, 217 წლიანი მონობის შემდეგ რუსული ცარიზმის უღელქვეშ.
“ვინ წარმოიდგენდა 1918 წლის გაზაფხულს იმას, რომ სულ რაღაც არასრული სამი წლის შემდეგ ჩვენი სამშობლო რუსული ბოლშევიზმის ჯოჯოხეთში მოხვდებოდა, სადაც ჯერ 1924 წელს განადგურდებოდა თითქმის მთელი ჭეშმარიტი ქართული ელიტა, რასაც მოჰყვებოდა უამრავი უდანაშაულო ქართველის დახვრეტა თუ პატიმრობაში სულის ამოხდა სტალინურ შინსახკომ/სუკ-ში და გულაგებში და 300000 ქართველი ახალგაზრდის დაღუპვა სხვის ომში. და აი 1980-იანი წლების ეროვნულ-განმათავისუფლებელი მოძრაობის ტალღამ, ზვიადისა და მერაბის თაოსნობით, მეორედ მეოცე საუკუნეში მოახერხა ჩვენი სამშობლოს გამოგლეჯა სისხლიანი რუსული იმპერიის კლანჭებიდან. თუმცა, მესამედ, უკვე ოცდამეერთე საუკუნის ოციან წლებში, უნდა პუტინის სისხლიან იმპერიას საქართველოს გადაყლაპვა და ვაგლახ, რომ ისევე როგორც ასი წლის წინ ქართველების ხელით ლამობს ამის გაკეთებას.
რას იზამ, კონსტანტინე მირზათა, სიმონ მაყაშვილების, შადიმან ბარათაშვილების, იოსებ ჯუღაშვილებისა და სერგო ორჯონიკიძეების ნაკლებობა საქართველოში არასოდეს იგრძნობოდა. და მე მაინც მჯერა ჩემი ერის, იმიტომ, რომ გვყავდნენ დავით აღმაშენებელი, ცოტნე დადიანი, ბიძინა ჩოლოყაშვილი, სოლომონ დიდი, პატარა კახი, სულხან-საბა ორბელიანი, ანტონ კათალიკოსი, სოლომონ დოდაშვილი, ალექსანდრე ორბელიანი, დიმიტრი ყიფიანი, ილია ჭავჭავაძე, დავით სარაჯიშვილი, ქაქუცა ჩოლოყაშვილი, ვალიკო ჯუღელი, ამბროსი ხელაია, ზვიად გამსახურდია და მერაბ კოსტავა. კრწანისის, ბაზალეთისა და აფხაზეთის კატასტროფებიც ყოფილან ჩვენს ისტორიაში, დიდგორის, ასპინძისა და 9 აპრილის გამარჯვებებთან ერთად. გილოცავთ 26 მაისს ქართველებო. გილოცავთ უკლებლივ ყველას.
მინდა ვიწამო, რომ მოვახერხებთ ოდესღაც ერთად დგომას და რუსული საფრთხისა და სახელმწიფოებრიობის მესამედ დაკარგვის კოშმარის თავიდან აცილებას. მოვუწოდებ ჩვენ მთავრობას, როდესაც ადეკვატურად გაიაზრებენ თუ რა საფრთხის წინაშე დგას დღეს საქართველო, ვაჟკაცურად დაუდგნენ რუსეთს, ისე როგორც 1921-24 წლებში დაუდგნენ რუს ბოლშევიკებსა და მათ ქართველ სატრაპებს დემოკრატიული საქართველოს მთავრობა და ქართველი ერი. მოღალატეები ვერასოდეს ვერ გაიმარჯვებენ საქართველოში. გაუმარჯოს, დამოუკიდებელ, დემოკრატიულ და არა რუსეთის მონა – დაჩმორებულ საქართველოს!”- წერს ზურაბ მარშანია.
