პოლონეთმა იპოვა ახალი მიზეზი, რომ არ გადასცეს „მიგ-29“-ის ტიპის სამხედრო თვითმფრინავები უკრაინას, – ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.
უკრაინის პრეზიდენტის თქმით, თვითმფრინავების საკითხზე მოლაპარაკება ჰქონდა ნატო-ს ხელმძღვანელობასთან.
„ძალიან გვინდოდა „მიგები“ მიგვეღო პოლონეთიდან, მაგრამ ვერ მოგვცეს, რადგან თავისთვის არ ჰქონდათ საკმარისი. ამიტომ ჩვენ შევთანხმდით ნატო-სთან, რომ, ჩვენი ბალტიელი მეგობრების მსგავსად, მათთვის საპოლიციო მისია გამოეყოთ. ჩვენ ამაზე შევთანხმდით. და რა ამის შემდეგ? პოლონეთმა მოგვცა თვითმფრინავები? არა. სხვა მიზეზი იყო? დიახ“, – აღნიშნა ვოლოდიმირ ზელენსკიმ.
უკრაინის პრეზიდენტმა ასევე თქვა, რომ უკრაინის ხელისუფლება მუდმივად სთხოვდა პოლონეთს, ჩამოეგდო პოლონეთის მიმართულებით მფრენი რუსული რაკეტები, თუმცა პოლონელებმა უარი განაცხადეს და თქვეს, რომ ამისთვის ნატო-ს მხარდაჭერა სჭირდებათ.
„იქ არის სტრიი, გაზსაცავი. ქვეყანა ამ გაზმომარაგებაზეა დამოკიდებული, ჩვენი ცხოვრება. რაც შეეხება პოლონელებს, აგდებენ რაკეტებს? არა. პოლონელებმა განაცხადეს, რომ მზად არიან ჩამოაგდონ, თუ ამ გადაწყვეტილებაში მარტო არ იქნებიან, თუ ნატო მათ მხარს დაუჭერს“, – აღნიშნა ზელენსკიმ.
