სალომე ზურაბიშვილმა უღალატა იმ იდეას, რითაც ის გახდა საქართველოს პრეზიდენტი. ის უნდა ყოფილიყო ზეპარტიული, არ უნდა ყოფილიყო მიკერძოებული რომელიმე მხარის სასარგებლოდ – რა მიზეზითაც ის აირჩიეს, ის ამ საქმეს ღალატობს, – ამის შესახებ ჯანდაცვის მინისტრმა, მიხეილ სარჯველაძემ მედიასთან განაცხადა.

„საინტერესო კითხვას დაბადებს, როგორ შეძლებენ ბატონი გვარამია და ქალბატონი ზურაბიშვილი ერთ პარტიაში შეხმატკბილებულად მოღვაწეობას“, – აღნიშნა მიხეილ სარჯველაძემ.

პარლამენტის თავმჯდომარე შალვა პაპუაშვილი, ოჯახის სიწმინდისა და მშობლების პატივისცემის დღესთან დაკავშირებით, ქაშვეთის წმინდა გიორგის სახელობის ტაძარში პარაკლისს დაესწრო. ამის შესახებ ინფორმაციას პარლამენტის პრესსამსახური ავრცელებს.

მცირე პარაკლისი საპატრიარქო ტახტის მოსაყდრე, სენაკისა და ჩხოროწყუს მიტროპოლიტმა შიომ (მუჯირი) სამღვდელოებასთან ერთად აღასრულა, რომლის დასრულების შემდეგ მოეწყო საზეიმო ლოცვითი მსვლელობა ყოვლადწმინდა სამების სახელობის საპატრიარქო ტაძრისკენ, სადაც შესრულდა სამადლობელი პარაკლისი.

შალვა პაპუაშვილის შეფასებით, ოჯახი სიწმინდის დღე მნიშვნელოვანი დღესასწაულია, რომელიც საქართველოს ეკლესიის ინიციატივით 10 წლის წინ დაწესდა.

„დღევანდელ სამყაროში ბევრი რამ დგას გამოწვევის წინაშე და მათ შორის, გამოწვევის წინაშე დგას ოჯახის ის ტრადიციული გაგება, რომელიც ათასწლეულებია მოგვდგამს, როგორც საქართველოში, ისე ზოგადად, სამყაროში. დღეს ცდილობენ, რომ ბევრი რამე კითხვის ნიშნის ქვეშ დააყენონ, ამოაყირაონ ღირებულებითი თვალსაზრისით. მნიშვნელოვანია, რომ საქართველოს ყველა მოქალაქემ ამ დღეს განსაკუთრებით გამოხატოს თავისი დამოკიდებულება ოჯახური ღირებულებების, უფროსების პატივისცემის, სტუმარ-მასპინძლობის მიმართ. როგორც დღეს მეუფე შიომ აღნიშნა, ოჯახში არის სამი ჰიპოსტასი – მამა, დედა და შვილი, ოჯახი არის კაცი, ქალი და ბავშვი და ოჯახის ეს გაგება სრულად უნდა იყოს აღქმული და წარმოჩენილი ხალხის მხრიდან”, – აღნიშნა პარლამენტის თავმჯდომარემ.

შალვა პაპუაშვილის განცხადებით, დღეს, საქართველოს სხვადასხვა ქალაქებში გამოსულმა მოსახლეობამ ფაქტობრივად გამოხატა საკუთარი დამოკიდებულება კონსტიტუციური კანონის პროექტის მიმართ.

„საპარლამენტო უმრავლესობამ დააინიცირა კონსტიტუციური კანონის პროექტი „ოჯახური ღირებულებებისა და არასრულწლოვანთა დაცვის” შესახებ. დღეს ამ კონსტიტუციური ცვლილების საყოველთაო – სახალხო განხილვის ბოლო დღე იყო. ასიათასობით მოქალაქე გამოვიდა თბილისში და საქართველოს სხვადასხვა კუთხეში და დღეს, ფაქტობრივად, რეფერენდუმი შედგა ამ კონსტიტუციური კანონის პროექტზე. დღეს, ქართველმა ხალხმა თავისი გამოსვლით ამ კონსტიტუციურ კანონპროექტს მხარი დაუჭირა. ახლა უკვე პარლამენტის ვალდებულებაა, რომ ეს რეფერენდუმი კანონად გადააქციოს და ჩვენ დავიწყებთ უკვე კონსტიტუციური კანონის პროექტის საპარლამენტო განხილვას. ახლა უკვე ოპოზიციას დაუდგება „ჭეშმარიტების მომენტი”, როდესაც მას მოუწევს თვალში ჩახედოს ამ რეფერენდუმში მონაწილე ხალხს, რომელიც დღეს გამოვიდა საქართველოს ქალაქებში და მიიღოს გადაწყვეტილება – ის დგას ქართველი ხალხის მხარეს, თუ ის დგას იმ პატარა ჯგუფების მხარეს, რომლებიც ცდილობენ ეს ღირებულებები შეარყიონ სხვადასხვა ქვეყანაში და მათ შორის, საქართველოში”, – აღნიშნა პარლამენტის თავმჯდომარემ.

ოჯახის სიწმინდისა და მშობლების პატივისცემის დღესთან დაკავშირებით გამართულ ღვთისმსახურებას და მსვლელობას პარლამენტის თავმჯდომარესთან ერთად საქართველოს პრემიერ-მინისტრი ირაკლი კობახიძე, თბილისის მერი კახა კალაძე, საკანონმდებლო და აღმასრულებელი ხელისუფლების წარმომადგენლები ესწრებოდნენ.

საქართველოს მთავრობის დადგენილებით, ოჯახის სიწმინდისა და მშობლების პატივისცემის დღესთან დაკავშირებით, 2024 წლის 17 მაისი უქმე დღედ არის გამოცხადებული.

ოჯახის სიწმინდის დღის და ხალხის ამ ბუნებრივი ძალის გადაფარვა ვერ შეძლეს რადიკალმა ოპოზიციონერებმა და გამჭვირვალობის კანონზე მორიგი სპეკულაცია წამოიწყეს, თითქოს კანონში ფიზიკური პირების რეგისტრაციის ვალდებულება დაემატა და თითქოს ტექსტში დაზუსტებები ფარულად შევიდა. როგორც ჩანს რადიკალურ ოპოზიციას ეს თემა დღევანდელი დღისთვის სპეციალურად შემონახული ჰქონდა, რომელზეც პარლამენტის სხდომათა დარბაზში ხმა არ ამოუღიათ, – ამის შესახებ პარლამენტის იურიდიულ საკითხთა კომიტეტის თავმჯდომარე, ანრი ოხანაშვილი სოციალურ ქსელში წერს.

როგორც ოხანაშვილი განმარტავს, კანონპროექტის ჯერ კიდევ დაინიცირებულ ვერსიაშივე ეწერა, რომ იუსტიციის სამინისტროს უფლება აქვს, კანონის შესაბამისად მოიძიოს საჭირო ინფორმაცია კონკრეტული ორგანიზაციის შემოსავლების/ხარჯების დადგენის მიზნით. მისივე თქმით, „მე-2 მოსმენის დროს, სხდომათა დარბაზში სრულად იყვნენ წარმოდგენილი რადიკალებიც, რასაც პლენარული სხდომის ვიდეოც ადასტურებს“.

„ოჯახის სიწმინდის დღის და ხალხის ამ ბუნებრივი ძალის გადაფარვა ვერ შეძლეს რადიკალმა ოპოზიციონერებმა და გამჭვირვალობის კანონზე მორიგი სპეკულაცია წამოიწყეს, თითქოს კანონში ფიზიკური პირების რეგისტრაციის ვალდებულება დაემატა და თითქოს ტექსტში დაზუსტებები ფარულად შევიდა.

როგორც ჩანს რადიკალურ ოპოზიციას ეს თემა დღევანდელი დღისთვის სპეციალურად შემონახული ჰქონდა, რომელზეც პარლამენტის სხდომათა დარბაზში ხმა არ ამოუღიათ.

რადიკალები მსგავს სპეკულაციაში ჩემი წინა პოსტითაც (კომიტეტზე მე-3 მოსმენის ხანგრძლივობასთან დაკავშირებით) ვამხილე, ამიტომ ახლაც საჭიროდ ვთვლი მათ მხილებასა და ჩვენი საზოგადოების დამატებით ინფორმირებას (იხ. აგრეთვე პლენარულ სხდომაზე კანონპროექტში ვითომ ფარულად შეტანილი დაზუსტების ამსახველი ვიდეომასალა):

რადიკალები კიდევ ერთხელ იტყუებიან, თითქოს ფიზიკურ პირებს (ჩვენს მოქალაქეებს) უცხო ძალის ინტერესების გამტარებელ სუბიექტად დარეგისტრირება ევალებათ. კანონი ამას არც ითვალისწინებდა და არც ახლა ითვალისწინებს!

კანონპროექტის ჯერ კიდევ დაინიცირებულ ვერსიაშივე ეწერა, რომ იუსტიციის სამინისტროს უფლება აქვს, კანონის შესაბამისად მოიძიოს საჭირო ინფორმაცია კონკრეტული ორგანიზაციის შემოსავლების/ხარჯების დადგენის მიზნით.

მე-2 მოსმენის დროს, პლენარულ სხდომაზე, სადაც ეს რადიკალებიც სრულად იყვნენ წარმოდგენილნი, მე-9 მუხლში დაზუსტდა შემდეგი:

ამ კანონის შესაბამისად მოთხოვნილი ინფორმაციის წარუდგენლობა გამოიწვევს დაჯარიმებას 5000 ლარის ოდენობით.

ეს ნიშნავს, რომ მხოლოდ ორგანიზაციის შემოსავლების/ხარჯების დადგენის მიზნით არის შესაძლებელი ასეთი ინფორმაციის გამოთხოვა და არა ზოგადად, როგორც რადიკალები ამბობენ, თითქოს ფიზიკური პირის მიერ ფინანსური დეკლარაციის შევსებისა და მისი დარეგისტრირების მიზნით.

დასკვნა: ის პრინციპი, რაც კანონპროექტის დაინიცირებულ ვერსიაში ეწერა, არც განხილვის პროცესში შეცვლილა.

არა დეზინფორმაციას!

კი გამჭვირვალობას!

კი ქართულ კანონს!

ღირსებით ევროპისკენ!” – წერს ანრი ოხანაშვილი.

პარლამენტის თავმჯდომარის მოადგილე არჩილ თალაკვაძე დღევანდელი დღის მნიშვნელობაზე საუბრობს.

„დღეს მთელი ერი და ბერი გაერთიანდა ჩვენი უნივერსალური ღირებულებების დასაცავად. ერთმანეთს და მთელ საერთაშორისო საზოგადოებას დღეს ვაწვდით ხმას, რომ საქართველო და ჩვენი საზოგადოება არის ერთიანი, როდესაც საქმე ეხება სამშობლოს და ოჯახს“, – აღნიშნა არჩილ თალაკვაძემ.

დღეს, ოჯახის სიწმინდისა და მშობლების პატივისცემის დღესთან დაკავშირებით მთელი ქვეყნის მასშტაბით საზეიმო მსვლელობები გაიმართა.

მიმდინარე პოლიტიკური მოვლენები მჭიდრო კავშირშია ეკონომიკურ დინამიკასთან, ეკონომიკის პროგრესთან და ეკონომიკურ პოლიტიკასთან. სამწუხაროდ, ის მოწოდებები, რომლებიც ოპონენტების მხრიდან ისმის, ბუნებრივია, დადებითად არ აისახება ქვეყნის ეკონომიკურ მოვლენებზე – ეს არის, პრინციპში, გამიზნული პოლიტიკა, რომელიც, ამ შემთხვევაში, ცდება პოლიტიკის მორალურ ჩარჩოებს ანუ ყველა გზით მიზნის მიღწევა, ვფიქრობ, არ არის მთლად ღირსეული და საქმე ზუსტად ამასთან გვაქვს, – ამის შესახებ ლევან დავითაშვილმა განაცხადა.

პირველმა ვიცე-პრემიერმა ხაზგასმით აღნიშნა, რომ საქართველოს ეკონომიკა დღეს არის საკმაოდ მყარი და ჯანსაღი, რაც აღიარებულია ყველა საერთაშორისო კომპეტენტური ინსტიტუტის მიერ. მისი შეფასებით, ქვეყნის მაკროეკონომიკური პარამეტრები აბსოლუტურად ჯანსაღია და შესაბამისად, პანიკის საფუძველი არ არსებობს, თუმცა, ეკონომიკის მინისტრის თქმით, ამავე დროს, ეკონომიკა საკმაოდ მგრძნობიარეა, სტაბილურობასთან პირდაპირ არის კავშირში, ამიტომ პოლიტიკოსები პასუხისმგებლობით უნდა მოეკიდონ თავიანთ განცხადებებს.

„ოპონენტები გამიზნულად ცდილობენ, რომ ჩვენი ეკონომიკური განვითარება შეაფერხონ, მაქსიმალური ზიანი მოუტანონ საკუთარი ქვეყნის ეკონომიკურ ინტერესებს, საკუთარ ქვეყანას. რა თქმა უნდა, ქვეყანა განზოგადებული ცნება არ არის, ამ შემთხვევაში საუბარია ჩვენი ქვეყნის მოსახლეობაზე, რადგან ეკონომიკის დაზიანება პირდაპირ აისახება თითოეული ჩვენი მოქალაქისა თუ ოჯახის ეკონომიკურ კეთილდღეობაზე. ვხედავთ, ბოლო დღეებში როგორი გამიზნული, მიზანმიმართული შეტევაა საქართველოს ეკონომიკაზე, არის განცხადებები, რომ ეკონომიკა დაზიანდება, ჩამოიქცევა, ლარის კურსი გაუფასურდება, ასევე არის მოწოდებები, რომ მოსახლეობამ გამოიტანოს დეპოზიტები და ა.შ. აქედან გამომდინარე, გადაჭარბების გარეშე, პირდაპირ შემიძლია განვაცხადო, რომ პანიკის დათესვის მცდელობა, რომელიც არაერთი პოლიტიკოსის მხრიდან მოვისმინეთ ბოლო დღეების განმავლობაში, ქვეყნისა და საკუთარი ხალხის ცალსახა ღალატია“, – აღნიშნა მინისტრმა.

ლევან დავითაშვილმა საქართველოს მოსახლეობის საყურადღებოდ კიდევ ერთხელ ხაზგასმით განაცხადა, რომ უახლოეს დღეებში ჩვენს ეკონომიკაში რაიმე ნეგატიური მოვლენების არანაირი ობიექტური საფუძველი არ არსებობს.

„დავინახეთ, რომ მათ შორის, ლარის კურსმა დაიწყო დასტაბილურება და იმ შემთხვევაში, თუ პანიკას აჰყვებიან მოქალაქეები, სამწუხაროდ, იზარალებენ. ამიტომ, ცალსახაა, რომ უნდა შევინარჩუნოთ ამ შემთხვევაშიც სიმშვიდე და ობიექტურად შევხედოთ მოვლენებს“, – განაცხადა პირველმა, ვიცე-პრემიერმა.

საქართველოს მთავრობის მეთაურთან ძალიან ნათლად ვთქვი, რომ ეს კანონი შეცდომაა და ის არ უნდა იქნას მიღებული, ახლა არაფერი შეცვლილა, – ამის შესახებ გერმანიის კანცლერმა ოლაფ შოლცმა შვეიცარიის პრეზიდენტ, ვიოლა ამჰერდთან ერთად, 15 მაისს გამართულ პრესკონფერენციაზე, „უცხოური გავლენის გამჭვირვალობის შესახებ“ კანონპროექტთან დაკავშირებით განაცხადა.

„აქ, ზუსტად ამ ადგილას, საქართველოს მთავრობის მეთაურთან ერთად ვიდექი და ძალიან-ძალიან ნათლად ვთქვი, რომ ეს კანონი შეცდომად მიმაჩნია და ის არ უნდა იქნას მიღებული. ახლა, როდესაც ეს [კანონის მიღება] გადაწყდა, არაფერი შეცვლილა,” – განაცხადა შოლცმა.

სალომე ზურაბიშვილს ამ კონსტიტუციისთვის სისხლი არ დაუღვრია, არ უბრძოლია, როდესაც კონსტიტუცია შენ გულთან ახლოს არ არის, მაშინ ისე თელავ, რომ არანაირი ემოციაც კი არ გიჩნდება ამაზე, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

მისი თქმით, ამ კონსტიტუციისთვის ქართველმა ხალხმა იბრძოლა.

„რაც შეეხება ქალბატონი სალომეს განცხადებას, კიდევ ერთხელ აღვნიშნავ, ეს არის კონსტიტუციის დარღვევა. იმ კონსტიტუციისა, რომელიც მას არ აინტერესებს, გავიგეთ უკვე რამდენჯერმე და ამიტომ დიდი მოლოდინი არც გვაქვს, რაიმე ღირებულებას ხედავდეს ის ქართულ კონსტიტუციაში. ეს კონსტიტუცია მისი არ არის, ამ კონსტიტუციისთვის მას სისხლი არ დაუღვრია, არ უბრძოლია. ამ კონსტიტუციისთვის ქართველმა ხალხმა ვიბრძოლეთ, ვინც აქ ვიყავით, ბავშვები ვიყავით, თინეიჯერები, მოზრდილები, თუ ზრდასრულები ჩვენ ვიბრძოლეთ ამ კონსტიტუციისთვის. მას ეს კონსტიტუცია თავისად არ მიაჩნია და ეს არის შედეგი. როდესაც კონსტიტუცია შენ გულთან ახლოს არ არის, მაშინ ამ კონსტიტუციას ისე თელავ, რომ არანაირი ემოციაც კი არ გიჩნდება ამაზე. ამიტომ ეს არის მთავარი პრობლემა. რაც შეეხება რაღაც ჯგუფების ლიდერობას, ამას ისედაც ვხედავთ რაც და როგორ არის. ოპოზიციაში სინამდვილეში არანაირი საკუთარი ნება არ გააჩნიათ, გარედან როგორც დაულაგებენ, რა კომბინაციით უნდა იყვნენ, ზუსტად ისე დალაგდებიან, არც მეტი, არც ნაკლები“, – განაცხადა პაპუაშვილმა.

კიდევ ერთხელ მინდა ხაზი გავუსვა – მუქარები და შანტაჟი ყველამ თავისთვის დაიტოვოს. არ ვიმსახურებთ, რომ ვიღაც, თუნდაც რომელიმე კონკრეტული ქვეყნის საგარეო საქმეთა მინისტრი, ტონით გველაპარაკოს, მაგ ტონით თავის მოსახლეობას ელაპარაკოს, – ამის შესახებ თბილისის მერმა, კახა კალაძემ.

კითხვაზე, ესტონეთის საგარეო საქმეთა მინისტრმა განაცხადა, რომ ვიზალიბერალიზაციის და შემდგომი ნაბიჯების საკითხს დააყენებს, არის თუ არა მზად „ქართული ოცნება“ აიღოს პასუხისმგებლობა, კალაძემ თქვა, რომ მმართველი გუნდი ყველაფერს აკეთებს ევროინტეგრაციის გზაზე და 2012 წლიდან არცერთი შემთხვევა არ ყოფილა, რომ ამ მიმართულებით არასწორი ნაბიჯი გადაედგა.

„კიდევ ერთხელ მინდა ხაზი გავუსვა, მუქარები და შანტაჟი ყველამ თავისთვის დაიტოვოს. არ ვიმსახურებთ, რომ ვიღაც, თუნდაც რომელიმე კონკრეტული ქვეყნის საგარეო საქმეთა მინისტრი, ტონით გველაპარაკოს, თავის მოსახლეობას ელაპარაკოს მაგ ტონით. კიდევ ერთხელ ვიმეორებ, ყველაფერს ვაკეთებთ ევროინტეგრაციის გზაზე და თქვენ ვერ ნახავთ ვერცერთ შემთხვევას, 2012 წლიდან მოყოლებული, რომ ჩვენ რაიმე არასწორი ნაბიჯი გადაგვედგა ქვეყნის საწინააღმდეგო. „ქართული ოცნება“ არის ის გუნდი, რომელიც ევროინტეგრაციის გზაზე ხელი მოაწერა ასოცირების ხელშეკრულებას, უვიზო მიმოსვლას, თავისუფალ ვაჭრობას, მიიღო კანდიდატის სტატუსი, კონსტიტუციაში ჩაწერა ევროპული მომავალი და ჩვენ ვართ ის გუნდი, ვინც ამ გზას გაიყვანს ბოლომდე“, – განაცხადა კახა კალაძემ.

მისი თქმით, ქვეყნის მოსახლეობის მიერ არჩეული პარლამენტის უმრავლესობის წევრები იღებენ კანონს საკუთარ ქვეყანაში და სხვა ქვეყნიდან ვიღაცა ამბობს, ყოველგვარი ახსნა-განმარტების გარეშე, რატომ იღებთ ამ კანონსო.

„ზუსტად ეს ადამიანები გამოდიოდნენ და მოგვიწოდებდნენ, რომ სააკაშვილს თუ არ გამოვუშვებდით ციხიდან, ქვეყანა დაშორდებოდა ევროპულ მომავალს, ეს ადამიანები ზუსტად ვინც დღეს გამოდიან და აკეთებდნენ ასეთ განცხადებებს, გვეუბნებოდნენ რომ თუ სანქციებს არ მივუერთდებოდით ე.ი დავიღუპებოდით და ქვეყანას უნდა აერჩია სად ვიყავით, სინათლეში, წარსულში თუ სიბნელეში. მაშინ ჩვენ არასწორი ნაბიჯი რომ გადაგვედგა და მივერთებოდით სანქციებს, გაგვეხსნა მეორე ფრონტი, გამოგვეშვა სააკაშვილი – სად ვიქნებოდით? ქვეყანაში გვექნებოდა უბედურება და ჯოჯოხეთი. ჩვენ უნდა ვიმოქმედოთ ქვეყნის ინტერესებიდან გამომდინარე, გადავდგათ ის ნაბიჯები, რაც ჩვენ სახელმწიფოებრიობას სჭირდება“, – განაცხადა კახა კალაძემ.

დღეს ფაქტობრივად შედგა რეფერენდუმი, ქართველმა ხალხმა თავისი გამოსვლით, თავისი ხმის გაგონებით დაუჭირა მხარი ოჯახური ღირებულებების დაცვის კანონპროექტს, ახლა ეს უკვე პარლამენტის ვალდებულებაა, ხალხის რეფერენდუმი გადააქციოს კანონად, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

მისი თქმით, ოჯახური ღირებულებებისა და არასრულწლოვანთა დაცვის შესახებ კანონპროექტის განხილვა დაიწყება და ოპოზიციას მოუწევს, თვალში ჩახედოს რეფერენდუმში მონაწილე ხალხს, მიიღოს გადაწყვეტილება, დგას თუ არა ქართველი ხალხის მხარეს.

„მინდა, მთლიანად საქართველოს მივულოცო ოჯახის სიწმინდის დღე. ეს მნიშვნელოვანი დღესასწაულია, რომელიც საქართველოს ეკლესიის ინიციატივით 10 წლის წინ დაწესდა. დღევანდელ სამყაროში ბევრი რამ დგას გამოწვევის წინაშე, მათ შორის ოჯახის ის ტრადიციული გაგება, რაც ათასწლეულებია მოგვდგამს, როგორც საქართველოს, ისე ზოგადად, სამყაროს. დღეს ცდილობენ, ბევრი რამე კითხვის ნიშნის ქვეშ დააყენონ. ღირებულებითი თვალსაზრისით ბევრი რამე ამოატრიალონ. ამიტომ მნიშვნელოვანია, ეს ინიციატივა, რომ საქართველოს ყველა მოქალაქემ ამ დღეს განსაკუთრებით გამოხატოს თავისი დამოკიდებულება ოჯახური ღირებულებების მიმართ. კერძოდ, დამოკიდებულება უფროსების პატივისცემის, სტუმარ-მასპინძლობის მიმართ. როგორც დღეს მეუფე შიომ აღნიშნა, სამი ეპოსტაზი, რომ ოჯახში არის მამა, დედა, ბავშვი, სადაც არის კაცი, ქალი და ბავშვი, ეს გაგება იყოს სრულად აღქმული და წარმოჩენილი ხალხის მხრიდან.

იცით, რომ საპარლამენტო უმრავლესობამ დააინიცირა კონსტიტუციური კანონის პროექტი ოჯახური ღირებულებებისა და არასრულწლოვანთა დაცვის შესახებ. დღეს ბოლო დღე იყო ამ კონსტიტუციური ცვლილების საყოველთაო-სახალხო განხილვის. დღეს 100 ათასობით საქართველოს მოქალაქე გამოვიდა თბილისში, საქართველოს სხვადასხვა კუთხეში, დღეს ფაქტობრივად, შედგა რეფერენდუმი ამ კონსტიტუციური კანონის პროექტზე და დღეს ქართველმა ხალხმა თავისი გამოსვლით, თავისი ხმის გაგონებით დაუჭირა მხარი. ახლა უკვე პარლამენტის ვალდებულებაა, ხალხის ეს რეფერენდუმი გადააქციოს კანონად. ჩვენ უკვე დავიწყებთ საპარლამენტო განხილვას კონსტიტუციური კანონის პროექტის. ახლა დაუდგება ოპოზიციას ჭეშმარიტების მომენტი, როდესაც მოუწევს თვალში ჩახედოს ამ რეფერენდუმში მონაწილე ხალხს, რომელიც დღეს გამოვიდა საქართველოს ქალაქებში და მიიღოს გადაწყვეტილება, დგას ქართველი ხალხის მხარეს, თუ დგას რაღაც პატარა ჯგუფების მხარეს, რომლებიც ცდილობენ, სხვადასხვა ქვეყანაში, მათ შორის საქართველოში შეარყიონ ღირებულებები“, – განაცხადა შალვა პაპუაშვილმა.