შარლ მიშელთან ვისაუბრე “ქართულ ქარტიაზე”, საქართველოსთვის საგზაო რუკაზე, რომელიც თანხვედრაშია ევროკავშირის რეკომენდაციებთან, – ამის შესახებ საქართველოს პრეზიდენტი სალომე ზურაბიშვილი ევროპული საბჭოს პრეზიდენტ შარლ მიშელთან გამართული შეხვედრის შემდეგ “ტვიტერის” პირად გვერდზე წერს.

“შეხვედრა ევროპული საბჭოს პრეზიდენტ შარლ მიშელთან, საქართველოს ურყევ მოკავშირესთან, უკრაინისთვის მშვიდობის სამიტზე. განვიხილეთ საქართველოს პოლიტიკურ ლანდშაფტი და ჩვენი ევროპული მომავლის უზრუნველყოფისკენ ნაბიჯები; ვისაუბრე “ქართულ ქარტიაზე”, საქართველოსთვის საგზაო რუკაზე, რომელიც თანხვედრაშია ევროკავშირის რეკომენდაციებთან,” – წერს ზურაბიშვილი.

ჩემს ქვეყანას, საქართველოს, შეუძლია გაიზიაროს უკრაინელი ხალხის რთული მდგომარეობა, ვინაიდან ბუჩამდე იყო აფხაზეთი – როგორც ფილმის სათაურშია, – ამის შესახებ საქართველოს პრეზიდენტმა სალომე ზურაბიშვილმა შვეიცარიაში მიმდინარე მშვიდობის გლობალურ სამიტზე სიტყვით გამოსვლისას განაცხადა.

მისი თქმით, უკრაინის წინააღმდეგ ომი უკვე 800 დღეზე მეტია მიმდინარეობს.

„უდანაშაულო სიცოცხლეების დაკარგვის, გაჩანაგებისა და ეკონომიკური განადგურების 800 დღე. 800 დღე რაც უკრაინელები თავისუფლებისთვისა და თავიანთი ქვეყნის ტერიტორიული მთლიანობისთვის, მაგრამ ასევე მთლიანად ევროპის თავისუფლებისთვისა და უსაფრთხოებისთვის იბრძვიან. და ამის მიღმაც, [იბრძვიან] დემოკრატიის იდეალებისთვისა და კანონის უზენაესობის შენარჩუნებისთვის ან აღდგენისთვის.

ჩემს ქვეყანას, საქართველოს, შეუძლია გაიზიაროს უკრაინელი ხალხის რთული მდგომარეობა, ვინაიდან ბუჩამდე იყო აფხაზეთი – როგორც ფილმის სათაურშია. და კი, უკრაინის წინააღმდეგ ომამდე საქართველოს წინააღმდეგ ომი იყო, არა ერთხელ, არამედ მრავალჯერ და უკრაინის ტერიტორიების ოკუპაციამდე საქართველოს ტერიტორიების ოკუპაცია იყო.

ასე რომ, ჩემს ქვეყანას შეუძლია გაიზიაროს ის რთული მდგომარეობა, რომელშიც უკრაინა ცხოვრობს – ბავშვების იძულებით გადაადგილება. ჩემს ქვეყანას შეუძლია გაიზიაროს არასტაბილურობასა და კონფრონტაციაზე შფოთვა, რომელიც რუსეთმა შავ ზღვაში მოიტანა თანამშრომლობისა და ურთიერთდაკავშირებულობის ნაცვლად, რომელზეც ჩვენ ყველანი ვფიქრობთ.

შავი ზღვრის მილიტარიზაცია, როდესაც რუსეთი ახალი დამატებითი საზღვაო ბაზის გახსნას გეგმავს საქართველოს ტერიტორიაზე, აფხაზეთის რეგიონში.

ჩემს ქვეყანას შეუძლია გაიზიაროს შფოთვა ბირთვულ უსაფრთხოებაზე, ვინაიდან ჩერნობილის კატასტროფის შედეგები გამოვცადეთ.

ყველა ამ მიზეზის გამო, შეგვიძლია გავიზიაროთ რწმენა, რომ უკრაინის წინააღმდეგ ომი უნდა შეწყდეს და გზა უნდა მიეცეს მშვიდობას უკრაინაში და მშვიდობას ევროპაში. ეს შეიძლება მხოლოდ მაშინ მოხდეს, თუ დღეს შემუშავებული წინასწარი ნაბიჯების გარდა, რუსეთი გაიაზრებს, რომ მას საზღვრები აქვს, ისევე როგორც ნებისმიერ სხვა სახელმწიფოს, და ჰყავს მეზობლები, როგორც ნებისმიერ სხვა სახელმწიფოს, და რომ საერთაშორისო საზოგადოება, უსაფრთხოების ახალი არქიტექტურა შესაძლოა მხოლოდ მაშინ არსებობდეს, როდესაც დიდი ქვეყნები აღიარებენ თავიანთ მეზობლებს, პატივს სცემენ თავიანთ მეზობლებსა და მათ ტერიტორიულ მთლიანობას.

დიდება უკრაინას,” – განაცხადა ზურაბიშვილმა.

„მშვიდობის სამიტი ნაკლებად ატარებს სერიოზულ სახეს, რადგან გადაწყვეტილების მიმღები მთავარი აქტორები არ მონაწილეობენ“ – ამის შესახებ, საპარლამენტო უმრავლესობის წევრმა, ბექა ოდიშარიამ განაცხადა.

მისი შეფასებით, საქართველოს პრემიერ-მინისტრი ირაკლი კობახიძე დაესწრო იმ პლატფორმას, სადაც მართლაც მიიღება გადაწყვეტილებები.

„ჩემი ღრმა პატივისცემა შვეიცარიას, შვეიცარიის ხელისუფლებას, უკრაინელ ხალხს, მაგრამ ეს სამიტი და ეს ფორმატი ნაკლებად ატარებს სერიოზულ სახეს, რადგან არ მონაწილეობენ მთავარი აქტორები, ვინც არის გადაწყვეტილების მიმღები. მათ შორის აშშ-ის ლიდერი, აღარ ვსაუბრობ სხვა იმ გმირებსა თუ ანტიგმირებზე, რომლებიც არიან ამ პროცესის უშუალო მონაწილეები. რისი გადამწყვეტია ზელენსკი ცალმხრივად სალომე ზურაბიშვილთან ერთად, ეს ალბათ საზოგადოებას ღიმილს ჰგვრის”- ამბობს ოდიშარია.

პოლონეთის პრეზიდენტთან, ანჯეი დუდასთან საუბარში ხაზი გავუსვი ქართველი ხალხის ევროკავშირში მისწრაფებებისადმი ურყევ ერთგულებას, რაც სასიცოცხლოდ მნიშვნელოვანია ევროკავშირის მიერ გადაწყვეტილების მიღებისას! – ამის შესახებ საქართველოს პრეზიდენტი სალომე ზურაბიშვილი სოციალურ ქსელ X-ზე წერს.

„მადლობა თქვენი ურყევი მხარდაჭერისთვის, ბატონო პრეზიდენტო ანჯეი დუდა.

განვიხილეთ მიმდინარე მოვლენები და ოქტომბრის არჩევნები, რომლებიც გადამწყვეტია საქართველოს დემოკრატიისთვის. ხაზი გავუსვი ქართველი ხალხის ევროკავშირში მისწრაფებებისადმი ურყევ ერთგულებას, რაც სასიცოცხლოდ მნიშვნელოვანია ევროკავშირის მიერ გადაწყვეტილების მიღებისას!” – წერს ზურაბიშვილი

პრეზიდენტის მხრიდან ეს არის პოლარიზაციის ინსტრუმენტად გამოყენების მცდელობა. ერთობა ასეთ შემთხვევაში კიდევ უფრო მაღალ მნიშვნელობას იძენს, – ამის შესახებ „ხალხის ძალის“ გენერალურმა მდივანმა, დეპუტატმა დიმიტრი ხუნდაძემ „დღის ქრონიკაში“ ჩართვისას განაცხადა.

მან სალომე ზურაბიშვილის გადაწყვეტილებაზე ისაუბრა, რომელმაც ფეხბურთის ფედერაციის წარმომადგენელთა ნაწილს სახელმწიფო ჯილდო არ გადასცა.

მისივე თქმით, ევროპის ჩემპიონატზე, საქართველოს ნაკრების თამაშის დროს მოქალაქეები ტელევიზორებს იქნებიან მიჯაჭვული.

„აქ რაიმე პოლიტიკური მდგენელის შემოტანა შეუძლებელია, უბრალოდ მიუღებელია და ეს არის პრეზიდენტის მხრიდან უმსგავსობა. მწვრთნელი არც „ქოცია“ და არც „ნაცი“, თორემ ალბათ, პრეზიდენტი იმასაც იკისრებდა, რომ ნაკრები თავად დაეკომპლექტებინა. ეს არასერიოზულია, წარმოუდგენელია. ამდენად, დავანებოთ ამას თავი. მისი დაყოფა ვერანაირ ნეგატიურ შედეგს ვერ გამოიტანს, რადგან გუნდიც, ფედერაციაც, ნაკრების წევრებიც, მწვრთნელიც და ერიც მათთან ერთად, დღეს არის ერთიანი და პოლიტიკური თუ სხვადასხვა მდგენელის მიუხედავად, ყველა ერთი მიზნისთვის იქნება გამსჭვალული, რომ ჩვენმა ნაკრებმა გაიმარჯვოს და საერთაშორისო ასპარეზზე კიდევ ერთხელ აიწიოს ქართული დროშა“, – განაცხადა ხუნდაძემ.

ევროკავშირის ელჩების მიერ უკრაინისა და მოლდოვის გაწევრიანებაზე მოლაპარაკებების ჩარჩო ფორმატის შეთანხმებას საქართველოს პრეზიდენტი სალომე ზურაბიშვილი გამოეხმაურა.

ზურაბიშვილის თქმით, იგი დარწმუნებულია, რომ მალე საქართველოც უკრაინისა და მოლდოვის რიგებს შეუერთდება.

„ვულოცავ უკრაინას და მოლდოვას მათ მიღწევას ევროკავშირში გაწევრიანების გზაზე. გულწრფელად ვულოცავ პრეზიდენტ ვოლოდიმირ ზელენსკისა და პრეზიდენტ მაია სანდუს ამ მნიშვნელოვანი მიღწევას. დარწმუნებული ვარ, ევროპელი ქართველი ერი მალე თქვენს რიგებს შეუერთდება“, – წერს ზურაბიშვილი

პარტია „გახარია საქართველოსთვის“ ლიდერი, გიორგი გახარია უკრაინას და მოლდოვას ევროკავშირში გაწევრიანების შესახებ მოლაპარაკების გახსნის გადაწყვეტილებას ულოცავს. გახარიას თქმით, როგორც კი არჩევნებში „ქართული ოცნება“ დამარცხდება საქართველოს ევროინტეგრაციის პროცესს დააჩქარებენ.

„ვულოცავ უკრაინას და მოლდოვას გაწევრიანების მოლაპარაკებების გახსნას. ოქტომბრის არჩევნები გადამწყვეტია საქართველოს ევროპული მომავლისთვის. როგორც კი „ოცნება“ დამარცხდება, საქართველოს მოქალაქეებთან ერთად დავაჩქარებთ ქვეყნის ევროინტეგრაციის პროცესს და უზრუნველვყოფთ საბოლოო წევრობას. საქართველოს უკუსვლა ევროინტეგრაციის გზაზე სრულად არის ანტი-დასავლური ხელისუფლების ბრალი, რომელმაც არ გაატარა დემოკრატიული რეფორმები და გააფორმა საგარეო კურსის ცვლილება ქვეყანაში“, – აცხადებს გიორგი გახარია.