ყაზახეთის ტელეარხმა „ხაბარ-24“-მა (Хабар-24) შაბათს, 29 აპრილს ეთერში გადასცა ვიდეოსიუჟეტი საქართველოს შესახებ., სათაურით „როგორ იცავენ საქართველოში ადგილობრივი გიდების ინტერესებს“ (ავტორი – იულია ტუჟილკინა).
გთავაზობთ ვიდეოსიუჟეტის ტექსტურ ვერსიას:
საქართველოში განზრახულია, რომ უცხოელებს გიდებად მუშაობა აეკრძალოთ. ამ მიზნით შემუშავების პროცესშია ახალი კანონპროექტი ტურიზმის შესახებ. საქმე იმაშია, რომ ადგილობრივი ექსკურსიამძღოლების მტკიცებით, ამ სფეროს უცხოეთიდან ჩამოსული პირები ქვეყანას არასწორ იმიჯს უქმნიან და აზიანებენ.
გიდად მუშაობა საკმაოდ მომგებიან საქმეს წარმოადგენს. უცხოეთიდან ჩამოსულ ექსკურსიამძღოლებს თავიანთი კლიენტურა ჰყავთ, ფასებიც, ადგილობრივებთან შედარებით, დაბალია, მაგრამ ქართველების ყველაზე მეტ მღელვარებას სრულიად სხვა გარემოება იწვევს – უცხოელი გიდების არაკომპეტენტურობა, რომელიც ქვეყნის იმიჯს ურტყამს.
ნატალია ანდრონიკაშვილი უკვე ათი წელია გიდებისთვის ტრენინგებს და სწავლებებს ატარებს და დარწმუნებულია, რომ უცხოელებს საქართველოს ტურიზმის სფეროში მუშაობა უნდა აეკრძალოთ
ნატალია ანდრონიკაშვილი, გიდი:
„ტურიზმი მსოფლიოს ყველა სახელმწიფოში კულტურისა და ისტორიის ნაწილად ითვლება. შესაბამისად, ადამიანებმა, რომლებმაც საქართველოს სახელმწიფო ენა არ იციან, ქართულად ვერ ლაპარაკობენ და ვერ კითხულობენ (თუნდაც ისინი საქართველოს მოქალაქეები იყვნენ), მათ შეზღუდული აქვთ ქართული ლიტერატურის გაცნობა, ვერ კითხულობენ საარქივო დოკუმენტებს და ვერ ეუფლებიან იმ ცოდნას, რაც გიდმა აუცილებლად უნდა იცოდეს. საბოლოო ჯამში“ ჩვენ მათი სახით მეზღაპრეების წინაშე ვდგებით“.
ტურიზმის სფეროში საქართველოს მოსახლეობის 70%-მდეა დასაქმებული: გიდები, მძღოლები, ხელოსნები, ოტელიერები, რესტორატორები და ბევრი სხვა მოქალაქე, მაგრამ ქვეყანაში ჯერ კიდევ არ არის მკაფიო წესები, რომლებიც ამ სფეროში დასაქმებული ადამიანების საქმიანობას დაარეგულირებს, კონტროლის არარსებობა კი ხშირად სერვისის ხარისხზე ნეგატიურ გავლენას ახდენს.
რუსუდან ჯაფარიძე, საქართველოს გიდების ასოციაციის ხელმძღვანელი:
„კანონი ტურიზმის შესახებ პირველ რიგში იქნება მიღებული, რომელიც ქვეყნის შიგნით არსებული ტურიზმის საკითხებს სამართლებრივად მოაგვარებს შემდეგი პუნქტების მიხედვით: ვის ექნება გიდობის უფლება, როგორ პირობებით, რა ლიცენზიები იქნება საჭირო და როგორი სერტიფიკატი იქნება გაცემული. ბოლო დრომდე ეს ყველაფერი ქაოსურად ხორციელდებოდა. ტურიზმზე რაღაც საერთო კანონი არსებობდა, თანაც არასრულყოფილი. 1996 წლიდან ამ სფეროში არაფერი არ გაკეთებულა“.
კანონპროექტზე მსჯელობა ჯერ-ჯერობით ტურიზმის გიდების ასოციაციისა და ბიზნესის დონეზე მიმდინარეობს. სავარაუდოდ, დოკუმენტს პარლამენტი საგაზაფხულო სესიის დროს განიხილავს.
