აშშ-ის კონგრესში MEGOBARI Act-ის მოსმენა დაიწყო. ჰელსინკის კომისიაში საქართველოსთან დაკავშირებით მსჯელობენ.

შეკრებილებს წარმომადგენელთა პალატის კონგრესმენმა და MEGOBARI Act-ის ავტორმა ჯო უილსონმა მიმართა.

მისი განცხადებით, საქართველოს ხელისუფლება ემსგავსება პუტინს მიუხედავად იმისა, რომ პუტინის მიერ ქვეყნის 20%-ია ოკუპირებული.

ამასთან, უილსონმი მიესალმა სახდეპის განცხადებას სავიზო აკრძალვებთან დაკავშირებით.

“ქართულმა ოცნებამ”, რომელსაც მართავს ბიძინა ივანიშვილი, დაგმო ყოველმხრივი ევროატლანტიკური და დემოკრატიული არჩევანი საქართველოს მოსახლეობის. მიიღო [უცხოელი აგენტების კანონი] და ამას მოჰყვა მასობრივი პროტესტი, რომელსაც ხედავთ”. ასევე აქტიურად ხდება პუტინის პოლიტიკის გადმოღება. საქართველოს უსაფრთხოების ძალები დარტყმას ახორციელებენ მოქალაქეებზე და “ქართული ოცნება” ახორციელებს ჩინეთის პოლიტიკურ პარტიასთან თავის ურთიერთობებს. ხდება ძირითადი ინფრასტრუქტურის გადაცემა ჩინური. ამას პასუხი უნდა გაეცეს ამიტომ, მივესალმები სახდეპის განცხადებას სავიზო აკრძალვებთან დაკავშირებით, ნებისმიერ პიროვნებასთან დაკავშირებით, რომელიც ძირს უთხრის საქართველოს დემოკრატიას და ჩვენ უნდა MEGOBARI Act-ის  წარდგინებით, საქართველოს წარმომდგენლებთან და ასევე სენატის და კონგრესმენების წევრებთან ერთად, მოხდეს სავიზო შეზღუდვებისა და სანქციების დაწესება იმ პირების მიმართ, ვინც ძირს უთხრის სახელმწიფოს დემოკრატიას და ახორციელესბს რეპრესიებს მოქალაქეების მიმართ. ეს ძალისხმევები საქართველოში წამყვან პირებთანაა დაკავშირებული. ასევე საჭიროა სპეციალური ჯგუფის ჩამოყალიბება, რომელიც იმუშავებს საქართველოში არჩევნებამდე და MEGOBARI Act-ის კანონპროექტი ხაზს უსვამს უფრო ძლიერ სიღრმისეულ ურთიერთობებს, რომელიც უნდა დამყარდეს საქართველოსა და აშშ-ს შორის. – განაცხადა უილსონმა.

რატი იონათამიშვილი პრეზიდენტის ირგვლივ 17 პარტიისა და 5 პოლიტიკოსის გაერთიანებას სიყალბეს უწოდებს. პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე მიიჩნევს, რომ სიყალბე შედეგს ვერ მოიტანს.

„ეს არის ამორალური გაერთიანება, ვინაიდან ის ადამიანები, ვინც ერთმანეთის მიმართ ზიზღით ერთიანდებოდნენ, ახლა პოლიტიკური ინტერესებისა და დავალებების ირგვლივ გაერთიანდნენ. ფაქტია, რომ ამ ადამიანების დაპირისპირებაც და ერთიანობაც არის დაცლილი ყოველგვარი ფასეულობებისა და ღირებულებებისგან. ეს არის ყალბი. შესაბამისად, შეუძლებელია სიყალბე შედეგიანი იყოს“, – განაცხადა იონათამიშვილმა.

პრეზიდენტ სალომე ზურაბიშვილის ქარტიას 17 პარტია და 5 პოლიტიკოსი უერთდება.

კრიტიკულად განწყობილ სამოქალაქო საზოგადოებაზე „უცხოური აგენტების“ შესახებ კანონით თავდასხმის შემდეგ საქართველოს მთავრობა მიზანში სექსუალურ უმცირესობებს იღებს, – ამის შესახებ სოციალურ ქსელში გერმანიის საგარეო ურთიერთობათა კომიტეტის თავმჯდომარე მიხაელ როთი წერს.

მისი თქმით, საქართველოს მმართველმა პარტიამ უნდა შეაჩეროს ინიციატივები, რომლებიც ქვეყნის მომავლის განადგურებისკენაა მიმართული.

„კრიტიკულად განწყობილ სამოქალაქო საზოგადოებაზე „უცხოური აგენტების“ შესახებ კანონით თავდასხმის შემდეგ საქართველოს მთავრობა მიზანში სექსუალურ უმცირესობებს იღებს. ლგბტი-ს წინააღმდეგ რუსულ სტილში რეპრესიები საქართველოს ევროპული ამბიციებისთვის კიდევ ერთი საგანგაშო ნიშანია. მმართველმა პარტიამ უნდა შეაჩეროს ინიციატივები, რომლებიც საქართველოს მომავლის განადგურებისკენაა მიმართული“, – წერს როთი.

საქართველოში სიტყვა „სანქციების“ ხსენებამ უკვე კომიკური ხასიათი მიიღო, ვინაიდან მუდმივად გვესმის, რომ იქნება სანქციები, მაგრამ არ ჩანს ეს სანქციები, – ამის შესახებ ანალიტიკოსმა ლევან ნიკოლეიშვილმა „დღის ქრონიკაში“ განაცხადა.

მისი თქმით, ამ საუბრების მიზანია მუქარა ხელისუფლებაზე და ეს საკითხი შანტაჟის თემად გადაიქცა.

​„ჩნდება მეორე შეკითხვა – რამდენად არ შეშინდა ხელისუფლება და რამდენად პრინციპული აღმოჩნდა ის თავისი სუვერენიტეტისა და შიდა საქმეების განსამტკიცებლად? პასუხია მარტივი – არა. ჩვენ, ქართველებს გვაქვს ერთი ყველაზე მთავარი რამ – როდესაც ასეთი შანტაჟით გვემუქრებიან, როდესაც ისეთ რაღაცებს მოგვიწოდებენ, რაც არის სამართლიანი ჩვენთან მიმართებაში და განსაკუთრებით თუ ეს ქვეყნის სუვერენიტეტსა და დამოუკიდებლობას ეხება, პრინციპულობას ვიჩენთ ჩვენ“, – განაცხადა ნიკოლეიშვილმა.

მისივე თქმით, გამჭვირვალობის კანონის წინააღმდეგ მხოლოდ საზოგადოების მცირე ნაწილი გამოდის – არასამთავრობო ორგანიზაციები, რომელთა საქმიანობაც არაგამჭვირვალეა, რადიკალური ჯგუფები და ადამიანები, რომლებიც ვერასოდეს ასრულებენ საკუთარ დაპირებებს. ანალიტიკოსი აცხადებს, რომ ამ ჯგუფებმა საზოგადოების გარკვეული ნაწილი აყოლიება შეძლეს, მოაწყვეს მიტინგები. მაგრამ სწორედ არჩევნები აჩვენებს იმას თუ რამდენი ადამიანი უჭერს მხარს ხელისუფლებას.

სამხედრო-სამრეწველო იმპერიალისტები უკრაინელი ხალხის სისხლისა და ცრემლების ხარჯზე აკეთეს და აკეთებენ მილიარდებს!, – წერს ექსპერტი ედიშერ გვენეტაძე სოციალურ ქსელში.

მისი თქმით, რომ არა საქართველოს ხელისუფლებისა და ხალხის ერთიანობა, ახლა საქართველოც ისეთივე მდგომარეობაში იქნებოდა, როგორშიც უკრაინაა. თუმცა, ექსპერტი აღნიშნავს, რომ საფრთხე ისევ არსებობს და არჩევნებზე ხალხმა პოლიტიკიდან საბოლოოდ უნდა გააძევოს ქვეყნის მოღალატეები.

„აი ეს არის სახე რეალური იმპერიალიზმის! დასავლეთის იმპერიალისტები რუს იმპერიალისტებთან ალიანსში (ეს რომ ასეა ზელენსკიც ადასტურებს) უკრაინას დაჰპირდნენ მიგიღებთ ნატოსა და ევროკავშირშიო! შეაქეზეს, ჩააბეს, საშინელ გამანადგურებელ ომში! შემდეგ უთხრეს უკრაინელებს თუ რუსეთს დაამარცხებთ მიგიღებთ ნატოში(ამაზე მეტი ცინიზმი გაგონილა?)! სამხედრო-სამრეწველო იმპერიალისტები უკრაინელი ხალხის სისხლისა და ცრემლების ხარჯზე აკეთეს და აკეთებენ მილიარდებს! ახლა კიდევ ბაიდენ-ჩერნენკოს პირით აკეთებენ განცხადებას: რა ნატო, რის ნატო, უკრაინელებო თქვენ ხომ არ გაჟრიალებთო! ამიტომაც, რომ არა საქართველოს ხელისუფლებისა და ხალხის ერთიანობა დღეს იგივე დღეში იქნებოდა საქართველო, რომელშიც უკრაინაა გლობალური ომის პარტიის ადგილობრივი ემისრების ლომჯარია, გიგაური, გვარამია, მელია, ხაზარაძე, ხატიას შუამავლობით! თუმცა საფრთხეს 26 ოქტომბრამდე არ გაუვლია! ამიტომ, 26 ოქტომბერს საქართველოს მოსახლეობავ ჰკა მაგათ, მაგ წუპაკ-მამაძაღლებს! საბოლოოდ გავაძევოთ ქართული პოლიტიკიდან ეს არაადამიანები და მივუჩინოთ ის ადგილი, რომელსაცსაქართველოს მოღალატე-გამყიდველნი და ხალხის უბედურების ხარჯზე გამდიდრების მოსურნენი იმსახურებენ!”, – წერს გვენეტაძე.

„ნაციონალური მოძრაობა“ არ ასაჯაროებს მათ ოფისთან მომხდარი ინციდენტის ამსახველ კადრებს. ეს ქმედება მხოლოდ ორ შესაძლებლობას ტოვებს: ამ პარტიის წარმომადგენლებმა ან ჩაიდინეს რაიმე საშინელება, რისი გამოჩენაც არ უნდათ, ან თავადვე დადგეს სპექტაკლი. შედეგი ერთია – დამნაშავეებს ხელს აფარებენ, – ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე, რატი იონათამიშვილი სოციალურ ქსელში წერს.

როგორც იონათამიშვილი აღნიშნავს, „ნაციონალური მოძრაობა“ პოლიციას ხელს უშლის და ამ დრომდე არ გამოუქვეყნებია ინციდენტის ამსახველი ვიდეოჩანაწერები, რომელსაც მათ ოფისზე განლაგებული ვიდეოკამერები აუცილებლად დააფიქსირებდა.

იონათამიშვილი „ნაციონალური მოძრაობის“ ოფისში მისულ დიპლომატიური კორპუსის წარმომადგენლებს მოუწოდებს, აღნიშნული გარემოებით დაინტერესდნენ.

„„Ნაციონალური მოძრაობა“ არ ასაჯაროებს იმ ინციდენტის ამსახველ კადრებს, რომელიც მათ ოფისთან მომხდარ ამბავს ეხება. მათი ეს ქმედება მხოლოდ და მხოლოდ ორ შესაძლებლობას ტოვებს: ან ამ პარტიის წარმომადგენლებმა ჩაიდინეს რაიმე საშინელება, რისი გამოჩენაც არ უნდათ, ან თავადვე დადგეს სპექტაკლი. შედეგი ერთია – ეს ადამიანები დამნაშავეებს ხელს აფარებენ. ამას ყველაზე ნათლად ადასტურებს ის გარემოება, რომ გუშინდელი დღიდან მოყოლებული, პოლიციას ხელს უშლიან და ამ დრომდე არ გამოუქვეყნებიათ ინციდენტის ამსახველი ვიდეოჩანაწერები, რომელსაც მათ ოფისზე განლაგებული ვიდეოკამერები აუცილებლად დააფიქსირებდა. მათ შორის, ყველაზე საინტერესოა უწყვეტი ჩანაწერი, რომელიც მათ გააჩნიათ და შეგნებულად მალავენ. განსაკუთრებით საყურადღებოა განვითარებული მოვლენების პირველი ეპიზოდის ამსახველი კადრები, რომელიც ტელეკომპანია „იმედის“ მიერ ექსკლუზიურად გასაჯაროვდა და სადაც ცხადად ჩანს, როგორ ემუქრებიან „ნაციონალური მოძრაობის“ თანამშრომლები ბიტითა და იარაღის სროლით ადამიანებს. როგორ გაგრძელდა ეს ამბავი, მხოლოდ „ნაცმოძრაობის“ ვიდეოკამერებზეა ასახული. ფაქტია, რომ კონკრეტულად ამ ეპიზოდის ამსახველი კადრები ბევრ რამეს ახდიდა ფარდას, თუმცა ისიც ფაქტია, რომ „ნაციონალური მოძრაობა“ ამას შეგნებულად მალავს. აქვე, მოვუწოდებთ მათ ოფისში სტუმრად მისულ დიპლომატიური კორპუსის წარმომადგენლებს, დაინტერესდნენ აღნიშნული გარემოებით და თავად დაუსვან კითხვა ამ პარტიის წევრებს, რატომ უშლიან ხელს გამოძიებას, სრულ ვიდეომასალას რატომ არ ასაჯაროებენ და არ აწვდიან საგამოძიებო უწყებას?“ – წერს რატი რატი იონათამიშვილი.

როცა შენ იმ განწყობით ხარ, რომ სიმართლე შენს მხარესაა, თუ დაიწყე, ეს შეიძლება ვიღაცისთვის მაღალფარდოვნად ჟღერდეს, მაგრამ უნდა გააგრძელო, თორემ რა გინდა ხელისუფლებაში და საჯარო სივრცეში, – განაცხადა „ხალხის ძალის“ პოლიტიკურმა მდივანმა მიხეილ ყაველაშვილმა ჟურნალისტებთან საუბრისას, როცა შეეხო იმას, თუ რის სანაცვლოდ ითხოვენ პარტნიორები ქვეყნის შიგნით მიღებული გადაწყვეტილებების გადახედვას და უკან დახევას.

მიხეილ ყაველაშვილი აცხადებს, რომ მისთვის კატეგორიულად მიუღებელია ქვეყნის სუვერენიტეტის თემით ვაჭრობა, მით უმეტეს, რომ ხელისუფლების და საზოგადოების პოზიცია ამ საკითხში თანხვედრაშია. თანადგომა, რომელიც საზოგადოებამ აჩვენა, ყაველაშვილის თქმით, იმაშიც გამოიხატებოდა, რომ, მუდმივად ისმოდა შეკითხვა, ხომ არ აპირებდა ხელისუფლება უკან დახევას.

„საპირწონედ რას გვთავაზობენ – უნდა ივაჭრო შენი ქვეყნის სუვერენიტეტით? სხვა რას უკავშირდება მათი მუქარები, რომ დაგვასანქცირებენ, ვიზალიბერალიზაციას შეგვიჩერებენ და ა.შ. ეს არის მოცემულობა? რომელი მოქალაქე მოგვთხოვს სუვერენიტეტით ვაჭრობას? არ გვეტყვის სუვერენიტეტს და დამოუკიდებლობას არ იცავ ვიზალიბერალიზაციის დაკარგვის გამოო? მნიშვნელოვანი რა არის – ამ ადამიანების, მათ შორის არასამთავრობო სექტორის წარმომადგენლების (ჩვენ შარშან მცირე ნაწილი ვიყავით და ახლა ეს გაითავისა 84 დეპუტატმა და ხელისუფლების და საზოგადოების ბევრმა წევრმა) ზეწოლა შეიძლება გაგრძელდეს, მაგრამ ჩვენ ამის არ გვეშინია. როცა შენ იმ განწყობით ხარ, რომ სიმართლე შენს მხარესაა, თუ დაიწყე, ეს შეიძლება ვიღაცისთვის მაღალფარდოვნად ჟღერდეს, მაგრამ უნდა გააგრძელო, თორემ რა გინდა ხელისუფლებაში და საჯარო სივრცეში? თუ ისტორია არ გახსოვს და არ იცი რისთვის იბრძოდა შენი წინაპარი – გადარჩენისთვის. სწორედ ეს გადარჩენის აქტი დაგვანახა საზოგადოებამ და გვკითხა უკან ხომ არ დაიხევთო. ამაში ვართ ერთიანი და მივალთ არჩევნებამდე. სხვა გზა ჩვენს საზოგადოებას არ აქვს. რასაც ჩვენ ვიძახდით „ფანჩატურ 2“-ზე გამართლდა, ეს ის „საზოგადოებაა“, რომელიც გარედან დაკვეთითაა დაკავშირებული ერთმანეთთან, თუმცა ერთმანეთს ვერ იტანენ,” – განაცხადა ყაველაშვილმა.

რაც შეეხება არასამთავრობო სექტორს, როგორც ყაველაშვილმა აღნიშნა, უკვე წლებია, რაც არასამთავრობო სექტორი რაღაც კასტას წარმოადგენს ქართულ პოლიტიკურ სივრცეში.

„ზოგჯერ იმდენად დიდია მათი გავლენა, რომ ხშირად პოლიტიკოსებზე მეტის უფლებას აძლევენ თავს, ოღონდ ეგაა, რომ ქართველი ხალხის არჩეულები ისინი არ არიან. ისინი არიან პირდაპირ გარედან დაფინანსებულები და ბედავენ (გაბედეს კიდეც, როცა ჯერ არჩევნების გაყალბებას მოაწერეს ხელი და შემდეგ ტექნიკური მთავრობის შექმნა მოითხოვეს) ხალხის სახელით საუბარს. ვინ ხართ თქვენ, რას წარმოადგენთ? მე ამ ხალხმა ამირჩია, თან უმრავლესობამ და მეც ვერიდები საქართველოს სახელით საუბარს, რადგან ოპოზიციის ამომრჩეველსაც ვითვალისწინებ. შენ ვინ ხარ, არასამთავრობო ორგანიზაცია რომ მეუბნები ტექნიკური მთავრობა უნდა ავირჩიოთო, ვინ მოგცა ამის ლეგიტიმაცია?“ – აღნიშნა ყაველაშვილმა.