უნგრეთი, როგორც ჩანს, მალე ევროპაში ერთადერთი ქვეყანა გახდება, რომელსაც კონფლიქტის ყველა მხარესთან შეუძლია საუბარი, – ამის შესახებ უნგრეთის პრემიერ-მინისტრმა, ვიქტორ ორბანმა კრემლში რუსეთის პრეზიდენტთან, ვლადიმერ პუტინთან შეხვედრის დროს განაცხადა.
„მსურს, ვისარგებლო შემთხვევით და თქვენთან ერთად განვიხილო რამდენიმე მნიშვნელოვანი საკითხი. მსურს, ვიცოდე თქვენი პოზიცია ევროპისთვის მნიშვნელოვან საკითხებთან დაკავშირებით. ქვეყნების რაოდენობა, რომლებსაც შეუძლიათ კონფლიქტის ორივე მხარესთან საუბარი, სწრაფად მცირდება. მალე უნგრეთი, როგორც ჩანს, გახდება ერთადერთი ქვეყანა ევროპაში, რომელსაც შეუძლია კონფლიქტის ყველა მხარესთან საუბარი“, – განაცხადა ვიქტორ ორბანმა.
თავის მხრივ, რუსეთის ლიდერმა განაცხადა, რომ მოხარულია მოსკოვში უნგრეთის მთავრობის მეთაურის ხილვით.
„რა თქმა უნდა, მზად ვარ, თქვენთან ერთად განვიხილო ნიუანსები ამ საკითხთან დაკავშირებით და იმედი მაქვს, შემატყობინებთ თქვენს და თქვენი ევროპელი პარტნიორების პოზიციას“, – თქვა ვლადიმერ პუტინმა.
ორმხრივ ურთიერთობებზე საუბრისას რუსეთის პრეზიდენტმა აღნიშნა, რომ რუსეთსა და უნგრეთს შორის ვაჭრობა 35 პროცენტით შემცირდა, თუმცა ქვეყნებს დიდი პროექტები აქვთ.
