ნატოს მოკავშირეებმა და პარტნიორმა ქვეყნებმა უკრაინის თავდაცვის საკონტაქტო ჯგუფის ფარგლებში, უკვე თავიანთი ვალდებულებების 98%-ზე მეტი შეასრულეს, – ამის შესახებ ნატოს გენერალურმა მდივანმა იენს სტოლტენბერგმა განაცხადა.
„საკონტაქტო ჯგუფის მეშვეობით, ალიანსის მოკავშირეებმა და პარტნიორებმა უკრაინას უპრეცედენტო დახმარება გაუწიეს. უკრაინას დაპირებული საბრძოლო მასალისა და აღჭურვილობის 98%-ზე მეტი უკვე მიეწოდა. ეს ნიშნავს 1 550-ზე მეტ ჯავშანმანქანას, 230 ტანკს და სხვა აღჭურვილობას, მათ შორის დიდი რაოდენობით საბრძოლო მასალას. ჯამში 9-ზე მეტი უკრაინული მექანიზებული ბრიგადა მოვამზადეთ. ეს მისცემს უკრაინას მტკიცე პოზიციას, გააგრძელოს ოკუპირებული ტერიტორიების დაბრუნება“, – განაცხადა სტოლტენბერგმა.
