უკრაინას აშშ-ში მომავალ კვირას დაგეგმილი საპრეზიდენტო არჩევნების დასრულების შემდეგ, შესაძლოა, რუსეთთან ცეცხლის შეწყვეტის შესახებ მოლაპარაკებები დაწყება მოუწიოს, წინააღმდეგ შემთხვევაში კიევი კრემლთან პირისპირ დარჩება და ომის გაგრძელება მარტო მოუწევს. სტატიას ამ შინაარსით Bloomberg-ი ავრცელებს.
სააგენტოს მტკიცებით, ინფორმაციას უკრაინის პრეზიდენტის ოფისთან დაახლოებული ადამიანები ავრცელებენ. როგორც Bloomberg-ი წერს, უკრაინელ მაღალჩინოსნებში სულ უფრო იზრდება უკმაყოფილება ომის მიმდინარეობის გამო.
რუსეთის ჯარი აღმოსავლეთ უკრაინის ფრონტზე უპირატესობას ზრდის. გასულ კვირას მან მიმდინარე წელს მიწის ყველაზე დიდი ფართობი დაიკავა. ამის გამო კიევის ევროპელი და ამერიკელი მოკავშირეები დიდ წნეხს განიცდიან, წერს Bloomberg-ი.
მიმდინარე წლის ზაფხულში რუსეთმა დიდი დანაკარგების ფონზე 200 კვადრატული კილომეტრის მიწის ფართობი დაიკავა. აგვისტოდან რუსეთმა 1 146 კვადრატული კილომეტრი დაიკავა. ეს მიმდინარე წლის შვიდ თვეში დაკავებული ტერიტორიების დაახლოებით მეოთხედს შეადგენს.
სააგენტოს უკრაინული კვლევითი ორგანიზაცია „რაზუმკოვ ცენტრის“ მონაცემები მოჰყავს, რომლის თანახმადაც ქვეყნის მოსახლეობის ორი მესამედი ფიქრობს, რომ დროა უკრაინამ რუსეთთან სამშვიდობო მოლაპარაკებები დაიწყოს, რაც 14 პროცენტული პუნქტით მეტია გასული წლის ანალოგიურ პერიოდთან შედარებით.
ამასთან ერთად, როგორც Bloomberg-ი იუწყება, ზელენსკიმ ჟურნალისტებს განუცხადა, რომ აპრილში აშშ-ის მიერ გამოცხადებული $61 მილიარდიანი დახმარებიდან კიევმა მხოლოდ 10% მიიღო, რაც ბიუროკრატიისა და ლოჯისტიკის ბრალია.
