„ტრამპმა პუტინი უკრაინის მიმართ აგრესიისათვის არ უნდა დააჯილდოვოს“, – ასეთი სათაური აქვს ბრიტანულ გაზეთ „ფაინენშელ თაიმსში” (Financial Times) გამოქვეყნებულ სტატიას, რომლის ავტორია მაიკ პომპეო, აშშ-ის ყოფილი სახელმწიფო მდივანი. პუბლიკაციაში იგი ეხება რუსეთ-უკრაინის ომის ზავით დასრულების შესაძლებლობებს და დონალდ ტრამპის სამშვიდობო მცდელობებს.
გთავაზობთ სტატიის მოკლე შინაარსს:
თუ რუსი დიქტატორი ვლადიმერ პუტინი მისი არმიის მიერ უკრაინის დაპყრობილ ტერიტორიებს შეინარჩუნებს, ეს იქნება სიგნალი მსოფლიოს ნებისმიერი დიქტატორისათვის, რომ მეზობელი ქვეყნის მიწა-წყლის ძალადობით ხელში ჩაგდება შეიძლება გამართლდეს.
რასაკვირველია, უკრაინაში მშვიდობის დამყარება ორივე დაპირისპირებული მხრიდან – როგორც მოსკოვისაგან, ისე კიევისაგან – ურთულეს და მძიმე კომპრომისებს მოითხოვს, მაგრამ ამ კომპრომისებსაც თავისი ფარგლები აქვს: ტერიტორიული საკითხები „წითელ ხაზად“ ითვლება.
უკრაინას არავინ არ უნდა დააძალოს, რომ მან რუსეთის ტერიტორიული პრეტენზიები აღიაროს – იმ ტერიტორიებისა, რომლებიც კრემლის არმიამ უკანონოდ დაიპყრო და მიიტაცა. ასეთი აღიარება დაუშვებელია, რადგან ის შეიძლება პრეცედენტად იქცეს რუსეთის პოზიციის ლეგიტიმიზებისათვის და მას დიდ სამხედრო და პროპაგანდისტულ გამარჯვებას მოუტანს.
რუსეთისადმი ტერიტორიული დათმობის შემთხვევაში ბალტიისპირეთის ქვეყნებს და სხვა პოსტსაბჭოთა ქვეყნებს – ისეთებს, როგორიც, მაგალითად, დღეს მოლდოვაა, სერიოზული საფუძველი ექნებათ იფიქრონ, რომ უკრაინის შემდეგ კრემლის დაპყრობების სიაში ისინი იქნებიან.
თუ აშშ მხარს დაუჭერს რუსეთის დაპყრობით პოლიტიკას, ეს იმას ნიშნავს, რომ ჩვენ ამით ჩინეთის ხელმძღვანელს სი ძინ პინს ხონჩით მივართმევთ თანხმობას ტაივანზე შეჭრასა და კუნძულის დაპყრობაზე.
გარდა ამისა, იმ შემთხვევაში, თუ ამერიკის შეერთებული შტატები, მოლაპარაკებაში შუამავლობის დროს, ხელს შეუწყობს ვლადიმერ პუტინის გამარჯვებას, დონალდ ტრამპი რუსეთ-უკრაინის ომს კი ვერ დაასრულებს, არამედ გარანტიას მიმცემი იქნება მომდევნო ომის დასაწყებად.
მოამზადა სიმონ კილაძემ
