თურქეთის საგარეო საქმეთა მინისტრმა, ჰაკან ფიდანმა, რომელმაც პარასკევს სტამბოლში უკრაინისა და რუსეთის დელეგაციების შეხვედრას უხელმძღვანელა, მოლაპარაკებები „მსოფლიო მშვიდობისთვის მნიშვნელოვან დღედ“ შეაფასა.
„ინტენსიური დიპლომატიური ძალისხმევის შედეგად, რუსეთისა და უკრაინის დელეგაციების შეხვედრა თურქეთის ხელშეწყობით სტამბოლში გაიმართა“, – დაწერა ჰაკან ფიდანმა სოციალურ ქსელ X-ზე.
„შეხვედრის შედეგად, მხარეები შეთანხმდნენ, 1000-1000 ტყვე გაცვალონ. ისინი ასევე შეთანხმდნენ, წერილობით გაუზიარონ ერთმანეთს ის პირობები, რომლებიც ცეცხლის შეწყვეტის მიღწევას გახდის შესაძლებელს“, – აღნიშნა თურქეთის საგარეო უწყების ხელმძღვანელმა.
ფიდანმა დასძინა, რომ ორივე მხარე პრინციპულად შეთანხმდა ხელახლა შეხვედრაზე.
