„თიბისი ლიზინგმა“ კაპიტალის ბაზრის მხარდაჭერის პროგრამაში გაიმარჯვა. როგორც „თიბისის“ მიერ გავრცელებულ ინფორმაციაშია აღნიშნული, „აღნიშნულის მიზეზი 15 მილიონი ლარის მწვანე საჯარო ობლიგაციების წარმატებული განთავსებაა, რაც საქართველოს კაპიტალის ბაზარზე, ფინანსურ ინსტიტუტებს შორის პირველი ეროვნული ვალუტაში დენომინირებული მწვანე საჯარო ობლიგაციების გამოშვებაა. აღნიშნული ემისია „თიბისი“ კაპიტალის მხარდაჭერით განხორციელდა.
„ემისიის ფარგლებში, „თიბისი ლიზინგმა“, საერთაშორისო სარეიტინგო კომპანია Scope Group-ისგან მეორე მხარის მოსაზრება მიიღო კომპანიის მწვანე ობლიგაციების ჩარჩოსთან დაკავშირებით. მეორე მხარის მოსაზრების თანახმად, „თიბისი ლიზინგის“ მწვანე ობლიგაციების ჩარჩო საერთაშორისო კაპიტალის ბაზრების ასოციაციის (ICMA) მიერ შემუშავებულ მწვანე ობლიგაციების პრინციპებთან (GBP) სრულ შესაბამისობაში მოდის.
კომპანია ობლიგაციების გამოშვებასთან დაკავშირებული ხარჯების თანადაფინანსების უზრუნველსაყოფად, ევროკავშირისაგან მნიშვნელოვან ფინანსურ დახმარებას მიიღებს. მხარდაჭერის მექანიზმს უზრუნველყოფს ევროპის რეკონსტრუქციისა და განვითარების ბანკი (EBRD) და ახორციელებს პროგრამის კონტრაქტორებთან – Galt & Taggart-სა და BDO Georgia-თან ერთად.
„თიბისი ლიზინგის“ მიერ განხორციელებული ტრანზაქცია პროგრამის ფართო სტრატეგიულ მიზნებს შეესაბამება, რაც საქართველოში კაპიტალის ადგილობრივი ბაზრის განვითარების ხელშეწყობას გულისხმობს, ასევე გარემოსდაცვითი, სოციალური და მმართველობითი საკითხების და ღირებულებების მხარდაჭერას.
ფასიან ქაღალდს 3-წლიანი ვადა აქვს და ფასიანი ქაღალდების საპროცენტო განაკვეთი არის თბილისის ბანკთაშორის განაკვეთი პლუს 2.75% მარჟა.
„მოხარული ვარ, რომ თიბისი ლიზინგი კაპიტალის ბაზრის მხარდაჭერის პროგრამიდან დახმარებას მიიღებს. იმედი მაქვს, რომ პროგრამა ხელს შეუწყობს ქვეყანაში მწვანე და მდგრადი ობლიგაციების გამოშვებას და გაზრდის ქვეყანაში მდგრადი დაფინანსების ხელმისაწვდომობას.
ჩვენ ძალიან ვამაყობთ, რომ წვლილი შეგვაქვს ქართული ლიზინგის სექტორის განვითარებაში. მინდა, მადლობა გადავუხადო პროგრამის დონორებსა და მხარდამჭერებს – ევროკავშირს, ევროპის რეკონსტრუქციისა და განვითარების ბანკს (EBRD), Galt & Taggart-სა და BDO Georgia-ს“,-განაცხადა „თიბისი ლიზინგის“ მთავარმა ფინანსურმა დირექტორმა, ნუგზარ ლოლაძემ“.
(R)
