თბილისისა და ბათუმის საერთაშორისო აეროპორტების გენერალური მენეჯერი საქართველოში პირდაპირი ფრენების დაწყებასა და სამომავლო თანამშრომლობაზე უმსხვილეს აზიურ ავიაკომპანიებთან მოლაპარაკებებს მართავს. თეა ზაქარაძე მალაიზიაში იმყოფება, რომელიც საავიაციო სფეროში ერთ-ერთ მასშტაბურ ფორუმს – Routes Asia 2024-ს მასპინძლობს.
TAV Georgia-ს პრესსამსახურის ცნობით, კონფერენციაში მონაწილეობენ უმსხვილესი ავიაკომპანიების, აეროპორტების, საავიაციო ხელისუფლებისა და ტურიზმის სფეროს პირველი პირები მსოფლიოს მრავალი ქვეყნიდან. ღონისძიება მოიცავს როგორც თემატურ პანელურ დისკუსიებს, ასევე აეროპორტებისა და ავიაკომპანიების ლიდერების ორმხრივ შეხვედრებს.
ფორუმის ფარგლებში ახალი პირდაპირი საჰაერო მიმართულებების განვითარებაზე მოლაპარაკებები მიმდინარეობს აზიის რეგიონის ლიდერ და სწრაფად მზარდ ავიაკომპანიებთან, რომელთა შორის არიან: Japan Airlines-ი, China Airlines-ი, Beijing Capital Airlines-ი, Air China და Air Asia Group-ი, რომელიც თავის მხრივ აერთიანებს AirAsia-ს, Air Asia India-ს, Philippines Air Asia-ს, Indonesia AirAsia-ს და Thai AirAsia-ს.
ასევე, შეხვედრები შედგა Hainan Airlines-ის, Etihad Airways-ის, Thai Lion Air-ის, Tianjin Airlines-ის, Malaysia Airlines Berhard-ის პირველ პირებსა და პეკინის აეროპორტის წარმომადგენლებთან.
