თავგამოდებით ვიცავთ მშვიდობას, რადგან ჩვენი ქვეყნის ეროვნული ინტერესების, ჩვენი შვილების მომავლის დასაცავად, პირველ რიგში, მნიშვნელოვანია, შევინარჩუნოთ მშვიდობა, – ამის შესახებ საქართველოს საგარეო საქმეთა მინისტრმა, მაკა ბოჭორიშვილმა თბილისის მდგრადი განვითარების რეგიონული ფორუმის შეფასებისას განაცხადა.
საგარეო საქმეთა მინისტრის თქმით, როდესაც საუბარია საქართველოს როლზე, განსაკუთრებით შუა დერეფნის განვითარების პროცესში, რეგიონში მშვიდობა სხვა მნიშვნელობას იძენს.
„ჩვენი დედაქალაქი საკმაოდ ბევრ სტუმარს მასპინძლობს სხვადასხვა ქვეყნიდან. ფორუმის თემა არის განვითარება, და განვითარებისთვის მთავარი, რა თქმა უნდა, მშვიდობაა, რაც ჩვენთვის არის აქტუალური და ძალიან რელევანტური, როდესაც ვსაუბრობთ განვითარებაზე. დღეს არაერთხელ აღინიშნა, რომ განვითარებაზე საუბარი წარმოუდგენელია მშვიდობის გარეშე და მშვიდობა არის სწორედ ის საფუძველი, რაც გვჭირდება იმისთვის, რომ ვისაუბროთ ჩვენს მომავალზე. ბოლო წლების განმავლობაში საკმაოდ სერიოზული გამოწვევების წინაშე ვიდექით და მშვიდობას აქვს განსაკუთრებული მნიშვნელობა ჩვენი ქვეყნისთვის. ეს საფრთხეები არსად წასულა. ჩვენი ქვეყნის ეროვნული ინტერესების, ჩვენი შვილების მომავლის დასაცავად უპირველესად მნიშვნელოვანია, შევინარჩუნოთ მშვიდობა ჩვენს ქვეყანასა და რეგიონში. როდესაც ვსაუბრობთ ჩვენი ქვეყნის როლზე, განსაკუთრებით შუა დერეფნის განვითარებაზე, აქ, რა თქმა უნდა, სხვა მნიშვნელობას იძენს ჩვენს მეზობლებთან ურთიერთობები და მშვიდობიანი თანაცხოვრების შესაძლებლობები სამხრეთ კავკასიის რეგიონში“, – განაცხადა ბოჭორიშვილმა.
