სუდანში ჩარჩენილ ქართველებთან და საკუთარ თანამშრომლებთან დაკავშირებით ავიაკომპანია Myway Airlines განცხადებას ავრცელებს. წერს, რომ მათი უსაფრთხო ევაკუაცია ამ დროისთვის ქვეყანაში არსებული სიტუაციიდან გამომდინარე, ვერ ხერხდება. თუმცა, მათივე ცნობით, კომპანიამ თანამშრომლებისთვის წყლისა და სურსათის მიწოდება შეძლო.
გატყობინებთ ჩვენს ხელთ არსებულ ბოლო სიახლეებს სუდანში მყოფი ჩვენი თანამშრომლების შესახებ. დღეს მოხერხდა მათთვის სურსათისა და წყლის მიწოდება და ამ დროისათვის, მათ აქვთ გარკვეული მარაგები.
შეგახსენებთ, რომ სუდანში სამსახურებრივი მივლინებით იმყოფება მაივეი ეარლაინსის 13 თანამშრომელი. შექმნილი სიტუაციიდან გამომდინარე, ჯერ-ჯერობით ვერ ხერხდება მათი უსაფრთხო ევაკუაცია. ისინი კვლავ რჩებიან თავიანთ საცხოვრებელ ადგილას და თავს იკავებენ გარეთ გამოსვლისა და გადაადგილებისაგან. მათი საცხოვრებელი უბანი ამჟამად წარმოადგენს შედარებით უსაფრთხო ზონას და სამხედრო მოქმედებები აღნიშნულ ტერიტორიაზე არ მიმდინარეობს.
ჩვენ განვაგრძობთ მუდმივ კონტაქტზე ყოფნას თურქეთში საქართველოს საელჩოსთან და კონსულთან, ასევე, სამოქალაქო ავიაციის სააგენტოსთან და ჩვენს კოლეგებთან ავიაკომპანია ჯეო სქაიდან. დიდ იმედს ვიტოვებთ, რომ ერთობლივი ძალისხმევით დროულად და უსაფრთხოდ შევძლებთ ჩვენი თანამშრომლების გამოყვანას კონფლიქტის ზონიდან, – წერს ავიაკომპანია.
