ამ წუთებში პარლამენტის უკანა შესასვლელთან და ჭიჭინაძის ქუჩის კუთხეში სპეცრაზმსა და „გამჭვირვალობის კანონის“ მოწინააღმდეგეთა აქციის მონაწილეებს შორის სიტუაცია დაიძაბა.
აქციის მონაწილეები პარლამენტის შენობის იმ შესასვლელთან მიახლოებას ცდილობენ, საიდანაც „ქართული ოცნების“ დეპუტატებმა საკანონმდებლო ორგანო უნდა დატოვონ. თუმცა, ტერიტორიაზე სამართალდამცველები არიან მობილიზებული და პროტესტის მონაწილეებს მიახლოების საშუალებას არ აძლევენ. აქციის მონაწილეებმა ცოტა ხნის წინ პარლამენტის შესასვლელთან კვერცხები ისროლეს.
„ახალის“ თავმჯდომარეებმა, ნიკა გვარამიამ და ნიკა მელიამ აქციის მონაწილეებს მოუწოდეს საკანონმდებლო ორგანოს პიკეტირება მოახდინონ და არ მისცენ „ქართული ოცნების“ დეპუტატებს თავისუფლად გამოსვლის შესაძლებლობა.
პოლიტიკოსები და აქტივისტები პარლამენტის ბლოკირებას აპირებენ, რაშიც მათ ხელს სპეცრაზმი და სამართალდამცველები უშლიან ხელს. დაპირისპირება გრძელდება, პოლიციას აქციის მონაწილეები რუსთაველის გამზირზე ჩაჰყავს.
ადგილზე მობილიზებულები არიან სამართალდამცველები და სპეციალური ტექნიკა.
პარლამენტის სხდომა უკვე დასრულდა და დეპუტატები საკანონმდებლო ორგანოს ტოვებენ.
