“სომხეთი მთიანი ყარაბაღიდან სომხების განსახლების საკითხს არ განიხილავს”

სომხეთი მთიანი ყარაბაღიდან 120 000 სომეხის განსახლების საკითხს არ განიხილავს, – ამის შესახებ სომხეთის პრემიერ-მინისტრმა, ნიკოლ ფაშინიანმა განაცხადა.

მისი თქმით, სომხეთი განიხილავს მთიან ყარაბაღში მცხოვრები სომხებისთვის ისეთი პირობების შექმნას, რომ საკუთარ სახლებში, თავიანთ დაბადების ადგილას იცხოვრონ.

“სომხეთი განსახლების საკითხს არ განიხილავს. სომხეთი განიხილავს შეიქმნას პირობები მთიან ყარაბაღში მცხოვრები სომხებისთვის, რათა საკუთარ სახლებში, თავიანთ ქვეყანაში, თავიანთ დაბადების ადგილას ცხოვრების შესაძლებლობა ჰქონდეთ”, – განაცხადა ფაშინიანმა.

სომხეთის პრემიერის მტკიცებით, მისი ადმინისტრაცია ცდილობს, გადადგას ნაბიჯები სომხეთსა და აზერბაიჯანს შორის უნდობლობის დასაძლევად.

„მე ასევე, ვსაუბრობ ბრიუსელში გამართული შეხვედრის დროს მიღწეულ შეთანხმებაზე. სომხეთი და აზერბაიჯანი შეთანხმდნენ, რომ აღიარონ ერთმანეთის ტერიტორიული მთლიანობა, იმის გათვალისწინებით, რომ არსებობს მთიანი ყარაბაღის მოსახლეობის უფლებებსა და უსაფრთხოებასთან დაკავშირებული საკითხი და ეს საკითხი უნდა გადაიჭრას, მისი უარყოფა შეუძლებელია. სხვა საქმეა, რომ აზერბაიჯანის მხრიდან დიდი უნდობლობაა სომხეთის მიმართ და პირიქით, ამიტომ საკითხავია, როგორ დაიძლიოს ეს უნდობლობა. ეს არის მიზეზი, რის გამოც გვინდა გადავდგათ ნაბიჯები, რომლებიც ამ უნდობლობას გადალახავს“, – აღნიშნა ფაშინიანმა.