ნატო-ს გენერალური მდივნის, იენს სტოლტენბერგის განცხადებით, ალიანსი უკრაინის მხარდამჭერ სარდლობას შექმნის, რომელიც კიევისთვის სამხედრო დახმარების მიწოდებას და გერმანიაში უკრაინელი სამხედროებისთვის წვრთნების ჩატარებას გაუწევს კოორდინაციას.
ამის შესახებ სტოლტენბერგმა დიდ ბრიტანეთში, ბლენჰაიმის სასახლეში მისვლის დროს ჟურნალისტებს განუცხადა, სადაც ევროპული პოლიტიკური გაერთიანების მე-4 შეხვედრა მიმდინარეობს.
„ჩვენ შევთანხმდით, შეიქმნას სარდლობა, რომელიც უკრაინისთვის სამხედრო დახმარების მიწოდებას და სამხედროებისთვის წვრთნების ჩატარებას გაუწევს კოორდინაციას“, – განაცხადა იენს სტოლტენბერგმა.
მისი თქმით, ახლა თავისუფლებისა და დემოკრატიის დაცვის დროა და ამის ადგილია უკრაინაში.
„რუსეთის მტრული ქმედებების, კიბერშეტევებისა და ნატო-ს მოკავშირეების წინააღმდეგ დივერსიების მიზანია, გვაიძულონ, უარი ვთქვათ უკრაინის მხარდაჭერაზე, მაგრამ ისინი ამას ვერ გვაიძულებენ. ჩვენ გავაგრძელებთ უკრაინის მხარდაჭერას“, – განაცხადა ჩრდილოატლანტიკური ალიანსის ლიდერმა.
