იმისათვის, რომ ქვეყანა სტიქიურ მოვლენებს მაქსიმალურად მომზადებული შეხვდეს, სახელმწიფო უსაფრთხოებისა და მონიტორინგის სისტემას აძლიერებს. გარემოს დაცვისა და სოფლის მეურნეობის მინისტრი ოთარ შამუგია ამ მიმართულებით უწყების გეგმებზე „ქრონიკას“ ესაუბრა.
„მიმდინარეობს და ძალიან მალე დასრულდება საფრთხის რუკების შედგენა, რაც პირველად კეთდება ქვეყანაში. ეს მოგვცემს საშუალებას შემდგომი მაღალი რისკ-ზონები განვსაზღვროთ და იქ შესაბამისი ღონისძიებები დავგეგმოთ.
შევიძინეთ 2 თანამედროვე რადარი, რომელიც საშუალებას გვაძლევს მოსალოდნელი ამინდის შესახებ უფრო ზუსტი ინფორმაცია მივაწოდოთ მოსახლეობას და შესაბამის სამსახურებს. გვაქვს კონკრეტული გეგმები წელს და ეს შეეხება, როგორც მყინვარული ხეობების პირველად შეფასებას, ასევე მაღალი რისკის ზონებში, მდინარეებში ვგეგმავთ ადრეული გაფრთხილების სისტემების მონტაჟს“, – განმარტა შამუგიამ.
გასულ დღეებში ქვეყანაში განვითარებულ სტიქიურ პროცესებს ადამიანების სიცოცხლე ემსხვერპლა, ზარალი კი რამდენიმე ათეულ მილიონს აღწევს.
