სასაზღვრო გამტარ პუნქტ „დარიალზე“ ე.წ. ნეიტრალურ ზონაში მყოფმა უკრაინის მოქალაქემ ყელზე დაზიანება მიიყენა. აღნიშნულ პიროვნებას დახმარება ადგილზე გაეწია და ადგილზე რჩება.
არსებული ინფორმაციით, უკრაინის მოქალაქემ თვითდაზიანება პროტესტის ნიშნად მიიყენა. ის ბუფერულ ზონაში არსებულ პირობებს აპროტესტებდა და ქვეყნის დატოვების უფლებას მოითხოვდა.
როგორც შსს-მ „ინტერპრესნიუსს“ განუცხადა, მომხდარზე გამოძიება დაიწყო სისხლის სამართლის კოდექსის 115-ე მუხლით, რაც თვითმკვლელობამდე მიყვანას გულისხმობს.
შინაგან საქმეთა სამინისტროს ინფორმაციით, სასაზღვრო გამტარ პუნქტ „დარიალზე“ რუსეთის ფედერაციიდან მომავალ პირებს, რომლებიც ითხოვენ საქართველოს სახელმწიფო საზღვრის კვეთას არავალიდური დოკუმენტებით და აცხადებენ, რომ არიან უკრაინის მოქალაქეები, სახელმწიფო უსაფრთხოების ინტერესებიდან გამომდინარე, ქვეყანაში შემოსვლის შესაძლებლობა არ მიეცათ.
მათივე განმარტებით, აღნიშნულ პირთა უმრავლესობას აქვს მძიმე კრიმინალური წარსული და გასამართლებულნი არიან არაერთგზის – მძიმე, ან განსაკუთრებით მძიმე დანაშაულებისთვის.
როგორც უწყება აღნიშნავს, ქართულმა მხარემ უკრაინულ მხარეს შესთავაზა რამდენიმე მექანიზმი, თუ როგორ შეიძლება მოხდეს ე.წ. ნეიტრალურ ზონაში მყოფი ადამიანების უსაფრთხოდ გაყვანა და დაბრუნება მათ სამშობლოში. უწყება იმედოვნებს, რომ უკრაინული მხარე დროულად მიიღებს გადაწყვეტილებას საკუთარი მოქალაქეების სამშობლოში დაბრუნებასთან დაკავშირებით.
