რუსეთთან გვაქვს მოლაპარაკებები სინოპის ატომურ ელექტროსადგურთან დაკავშირებით და გვჯერა, რომ ამ მხრივ სერიოზული ნაბიჯების გადადგმა შეგვიძლია, – ამის შესახებ თურქეთის პრეზიდენტმა, რეჯეფ თაიფ ერდოღანმა, ასტანაში, რუსეთის პრეზიდენტთან, ვლადიმერ პუტინთან შეხვედრის დროს განაცხადა.
თურქეთის პრეზიდენტმა იმედი გამოთქვა, რომ „აკუიუს“ ატომური ელექტროსადგურის მშენებლობა უახლოეს მომავალში დასრულდება, რომელსაც თურქეთი რუსეთის დახმარებით აშენებს.
ერდოღანის განცხადებით, ქვეყნებს შორის ორმხრივი ვაჭრობა 55 მილიარდი დოლარია, თუმცა ამოცანა 100 მილიარდ დოლარამდე გაზრდაა.
ერდოღანმა ასევე აღნიშნა, რომ ტურიზმის კუთხით ძალიან მნიშვნელოვანია ყოველწლიურად თურქეთში, დაახლოებით 7 მილიონი რუსი ტურისტის ჩასვლა.
„დიდი ხანია ჩემს მეგობართან შეხვედრა ვერ შევძელით. შეხვედრები გვქონდა სატელეფონო დიპლომატიური გზით, ამასობაში ჩვენი მინისტრები მუდმივ კონტაქტზე იყვნენ“, – აღნიშნა რეჯეფ თაიფ ერდოღანმა.
