რუსეთი ოკუპირებულ ოჩამჩირეში სამხედრო – საზღვაო ძალების ბაზას განათავსებს.
როგორც დე ფაქტო პრეზიდენტმა ასლან ბჟანიამ თქვა, შესაბამისი ხელშეკრულება უკვე გაფორმებულია.
„ხელი მოვაწერეთ შეთანხმებას და უახლოეს მომავალში რუსეთის საზღვაო ძალების მუდმივი ბაზა ოჩამჩირის რაიონში იქნება“, – განაცხადა ბჟანიამ გაზეთ „იზვესტიასთან“ ინტერვიუში.
მისივე თქმით, ღონისძიება მიზნად ისახავს რუსეთის, ისე “აფხაზეთის თავდაცვისუნარიანობის დონის ამაღლებას”.
გარდა ამისა, ასეთი ურთიერთქმედება გაგრძელდება, რადგან „უსაფრთხოება პირველ ადგილზეა“.
ბჟანიამ განმარტა, რომ რუსეთთან სამხედრო თანამშრომლობის კუთხით უკვე ბევრი რამ გაკეთდა, მაგრამ ასევე „ბევრი ნაბიჯია გადასადგმელი“. მისი თქმით, გარკვეული ინტერვალებით წვრთნები ტარდება და დამყარებულია ურთიერთქმედება სამხედრო-ტექნიკურ თანამშრომლობაზე.
„რუსეთი მხარს გვიჭერს, ჩვენი სპეციალისტები მუდმივად გადიან კვალიფიკაციის ამაღლებას რუსეთის ფედერაციის სპეციალურ დაწესებულებებში, ამიტომ ეს საკითხი, რა თქმა უნდა, დღის წესრიგიდან არასდროს გადის“, – დასძინა ბჟანიამ.
