რუსეთი გლობალური ეკონომიკური კრიზისის გამოწვევით იმუქრება

კრემლი დასავლეთის ქვეყნებს ემუქრება, რომ სანქციების საპასუხოდ, ეკონომიკურ კრიზისს მიიღებენ.

რუსეთის ფედერაციის უშიშროების საბჭოს თავმჯდომარის მოადგილემ დიმიტრი მედვედევმა განაცხადა, რომ თუ G7 ქვეყნები სრულად აკრძალავენ რუსეთში საქონლის ექსპორტს, მოსკოვი ამას შესაბამისად უპასუხებს. კერძოდ, მათი ქმედების განხორციელების შემთხვევაში, შეწყვეტენ საქონლის იმპორტს G7-ის იმ ქვეყნებში, რომელთათვისაც ეს აკრძალვა „ყველაზე მგრძნობიარე” იქნება.

„მათთვის დასრულდება მარცვლეულის შეთანხმება და შეუწყდება ბევრი სხვა რამ, რაც მათ სჭირდებათ“, – განაცხადა მედვედევმა.

კრემლის სპიკერმა დიმიტრი პესკოვმა განაცხადა, რომ რუსეთის წინააღმდეგ ახალი, დამატებითი სანქციებით, დაზარალდება მსოფლიო ეკონომიკაც და ეს იქნება სვლა გლობალური ეკონომიკური კრიზისისაკენ.

როგორც ცნობილია, შეერთებული შტატები და G7-ის ქვეყნების წარმომადგენლები განიხილავენ რუსეთში ექსპორტის სრულ აკრძალვას. Bloomberg -ის ინფორმაციით, ეს საკითხი G7-ის ლიდერებმა სამიტზე უნდა განიხილონ, რომელიც მაისში გაიმართება.