![დაუშვილი](https://geotimes.ge/wp-content/uploads/2024/08/daushvili.jpg)
სააკაშვილი ცდილობს, ყველაფერი სათავისოდ გამოიყენოს, თითქოს ის არის ერთადერთი, განუმეორებელი და ყველა მასზე ლაპარაკობს. აშშ-ის საელჩომ დაადასტურა, რომ ჯინ შაჰინისა და მაიკ ტერნერის ვიზიტისას განსახილველი თემა საერთოდ არ ყოფილა მიხეილ სააკაშვილი, – ამის შესახებ პარტია „საქართველოსთვის“ წევრმა, მიხეილ დაუშვილმა განაცხადა.
დაუშვილის თქმით, ეს არის რეალობა და სააკაშვილმა უნდა გააცნობიეროს.
„როგორც „ქართული ოცნება“ ცდილობს, სააკაშვილის კონტექსტით ყველაფერი პოლიტიკურ დივიდენდად გამოიყენოს, ზუსტად ასეა სააკაშვილიც. ხომ არ გგონიათ, რომ რამით უკეთესია ვინმეზე? ეგეც ცდილობს, ყველაფერი სათავისოდ გამოიყენოს, ვინც არ უნდა ჩამოვიდეს ამ ქვეყანაში, თითქოს ის არის ერთადერთი, განუმეორებელი და ყველა მასზე ლაპარაკობს. აშშ-ის საელჩომ პირდაპირ დაადასტურა, რომ თემა საერთოდ არ ყოფილა მიხეილ სააკაშვილი, ეს არის რეალობა და მანაც უნდა გააცნობიეროს. უნდა გააცნობიეროს, რომ დღეს ის თემა და განსახილველი საკითხი აღარ არის, ამას უნდა შეეგუოს. რაც მალე გაიგებს, მით უკეთესი იქნება თავისთვისაც, ყველასთვისაც და ქვეყნისთვისაც. დღეს მიხეილ სააკაშვილს ვინც აქტუალურს ხდის, არის „ოცნება“. რამდენჯერაც არ უნდა გამოჩნდეს, იქნება სასამართლო სხდომა თუ რაიმე სხვა, ყველგან პირდაპირ ეთერშია. ეთერში გადასცემენ, როგორც შეუძლიათ, რათა მთელ ქვეყანას მოასმენინონ და მთელი ქვეყნისთვის აქტუალური გახადონ.
დღეს მიხეილ სააკაშვილის აქტუალურობას ყველაზე მეტად ხელს უწყობს „ქართული ოცნება“. როგორც „ოცნება“ არის მატყუარა, ისე – ეგ. წარმოიდგინეთ, ისეთი ტყუილი იყო, რომ საელჩოს დასჭირდა, საზოგადოებისთვის ეთქვა, იტყუებაო. რამდენად მძიმე მოსასმენია, ცუდი, მძიმე ამბავია, როცა ყოფილი პრეზიდენტი ისეთ ტყუილს ამბობს, რომ შენს მთავარ სტრატეგიულ პარტნიორს უწევს, ღიად თქვას, იტყუებაო. „ოცნების“ კრიტიკა ხომ ერთია, მაგრამ ესეც ამორალური და მიუღებელია. ისეთ რაღაცას როგორ იტყუები, რომ ვის სახელსაც 24 საათი იყენებ, ის იძულებული ხდება თქვას, იტყუებაო. არ ვიცი, რაში წერია ეს“, – განაცხადა მიხეილ დაუშვილმა.
საქართველოს ყოფილმა პრეზიდენტმა, მიხეილ სააკაშვილმა სენატორ ჯინ შაჰინისა და ამერიკის წარმომადგენლობათა პალატის, სადაზვერვო კომიტეტის თავმჯდომარის მაიკ ტერნერის საქართველოში ვიზიტთან დაკავშირებით სოციალურ ქსელში დაწერა: „მიხარია, რომ სენატორი შაჰინი ხშირად საუბრობს ჩემზე, ხოლო მაიკ ტერნერმა ცოტა ხნის წინ ჩემი გათავისუფლების მოთხოვნის წერილი გაუგზავნა ოფიციალურად სახელმწიფო დეპარტამენტს. მადლობელი ვარ იმისთვისაც, რომ, ჩემი ინფორმაციით, სხვადასხვა შეხვედრაზე ამჯერადაც ჩემი უკანონო და უსამართლო პოლიტპატიმრობის საკითხი არაერთხელ წამოიჭრა“.
მოგვიანებით განცხადება გაავრცელა საქართველოში აშშ-ის საელჩომ, სადაც აღნიშნულია: „ჯინ შაჰინისა და მაიკ ტერნერის ვიზიტისას სააკაშვილის საკითხი არ განხილულა, განხილვის საკითხი იყო, რომ აშშ-ს სურს კარგი ურთიერთობა საქართველოსთან და პირველი ნაბიჯი საქართველოს მთავრობამ უნდა გადადგას“.