უკრაინის ჯარები ქვეყნის სამხრეთ ნაწილში წინ მიიწევენ. თავდაცვის მინისტრის მოადგილის, ანა მალიარის თქმით, წინსვლაა მელიტოპოლისა და ბერდიანსკის მიმართულებით. მისივე მტკიცებით, უკრაინული ძალები ასევე წარმატებით უტევენ ოკუპანტებს აღმოსავლეთში, ბახმუტის ფლანგებზე.
მძიმე ბრძოლები გრძელდება სტარო მაიორსკეს მახლობლად, სადაც უკრაინელები ახლახან დაკავებულ პოზიციებს ამაგრებენ. პარალელურად, რუსული ძალები უკრაინის ქალაქებს ბომბავენ. ოკუპანტთა სამიზნე კიევის, ლვოვის, ხმელნიცკის, კიროვოგრადისა და ჟიტომირის ოლქები გახდა. ინფორმაცია მსხვერპლის შესახებ არ გავრცელებულა. რაკეტების უმრავლესობა საჰაერო თავდაცვის სისტემებმა გაანეიტრალა.
დრონებით თავდასხმის საფრთხე იყო ღამით უკრაინის თითქმის ყველა ოლქში. გამოცხადებული იყო საჰაერო განგაში. რუსულმა ძალებმა იერიში მიიტანეს ქალაქ ხმელენცკიდან 5 კილომეტრის დაშორებით მდებარე აეროდრომზე.
14-ჯერ დაიბომბა სუმის ოლქის 6 სასაზღვრო დასახლება, დაფიქსირდა ასამდე აფეთქება.
უკრაინის თავდაცვის მინისტრის მოადგილის ინფორმაციით სამხრეთში, მელიტოპოლისა და ბერდიანსკის მიმართულებით უკრაინელი სამხედროები შეტევით ოპერაციებს წარმატებით აგრძელებენ.
ნატო შავი ზღვის რეგიონში საპატრულო თვითმფრინავებისა და დრონების გამოყენებით დაზვერვას გააძლიერებს – ნათქვამია ნატო-უკრაინის საბჭოს სხდომის დასკვნით განცხადებაში.
ჰოლოდომორი უკრაინელი ხალხის გენოციდად აღიარა იტალიის სენატმა.
