უზბეკეთის დედაქალაქ ტაშკენტში დასრულებულ მე-13 მსოფლიოს ჩემპიონატზე შოტოკან კარატეში, წარმატებით იასპარეზეს საქართველოს კარატეს ერონული ფედერაციის წარმომადგენლებმა. საერთო ჯამში ქართველმა კარატისტებმა 14 მედალი მოიპოვეს, აქედან ორი ოქროს, ორი ვერცხლის და 10 ბრინჯაოსი დაიმსახურეს. უმაღლესი სინჯის მედლები პარასპორტსმენთა შორის ჯონი თოფურიამ და ალექსანდრე შამუგიამ მოიპოვეს, ვერცხლის ბექა ბეჟუაშვილმა და ანდრია კუპრეიშვილმა.
საქართველოს კარატისტთა ნაკრები გუნდის ლიდერმა ლუკა ხვედელიანმა, პირად პირველობაში ბრინჯაოს სინჯის მედალი დაისაკუთრა, თუმცა, რომ არა ½ ფინალში, რომელსაც ლუკა 3:1 იგებდა, მოწინააღმდეგე სპორტსმენის მიერ გამოყენებული აკრძალული დარტყმა ყელის არეში, მეტის მიღწევაც შეეძლო. ამ დარტყმის შედეგად კი ხვედელიანმა უმძიმესი ტრავმა მიიღო და ვეღარ შეძლო ფინალში მონაწილეობა. აღსანიშნავია, რომ პირველ ადგილზე გასულმა უზბეკმა სპორტსმენმა ღირსეული საქციელით დაგვამახსოვრა თავი და ქართველ კარატისტს დაუთმო თავის პირველი ადგილი კვარცხლბეკზე, როგორც უფრო დამსახურებულ სპორტსმენს. ჩვენმა კარატისტებმა უფროს ასაკობრივ კატეგორიაში ვაჟთა შორის გუნდურ შეჯიბრებაზე ასევე ბრინჯაოს მედლები დაიმსახურეს.
მსოფლიოს ჩემპიონატზე საერთო ჯამში საქართველომ 31 მონაწილე ქვეყნას შორის მე-7 ადგილი დაიკავა.
