ქარიშხალი მილტონი, რომელიც ფლორიდის შტატს დაატყდა თავს, აშშ-ში საპრეზიდენტო არჩევნების ერთ-ერთი მთავარი თემა გახდა. დონალდ ტრამპმა გადაწყვიტა გამოეყენებინა ქარიშხალი ბაიდენ-ჰარისის ადმინისტრაციის დისკრედიტაციისთვის. მან ეს გააკეთა ჩვეული წესით, სიცრუისა და შეთქმულების თეორიების გავრცელებით. კამალა ჰარისისა და დემოკრატიული პარტიისთვის ტრამპის საქციელი ნამდვილი საჩუქარი გახდა.
ფაქტია, რომ კამალა ჰარისის საპრეზიდენტო კამპანიის წარმატებული დაწყების შემდეგ, მის შტაბში კრიზისი გაჩნდა. ჰარისი რეიტინგში ტრამპს უსწრებს რამდენიმე პროცენტული პუნქტით, მაგრამ ეს საკმარისი არ არის არჩევნებში დამაჯერებლად მოსაგებად. CNN-ის თანახმად, ჰარისის გუნდში მზარდი შეშფოთება იყო, რომ მისი კამპანია ჭაობში გაეხვია. ჰარისის მრჩევლები კამათობდნენ იმაზე, თუ რომელ თემაზე უნდა გაემახვილებინათ ყურადღება არჩევნებში გასამაჯვებლად.
ტელეკომპანიის NBC-ის ცნობით, კამალა ჰარისის მრჩევლებმა გადაწყვიტეს ეკონომიკურ პრობლემებზე ფსონი დაედოთ. ჰარისი იქნება პოზიციონირებული, როგორც საშუალო კლასის ინტერესების დამცველი, ხოლო ტრამპი, როგორც სუპერ მდიდარი ამერიკელებისთვის გადასახადების შემცირების მხარდამჭერი.
მაგრამ ქარიშხალმა მილტონმა შეცვალა არჩევნების სცენარი. ტრამპი ფსონს დებს დოქტორ გებელსის „დიდი ტყუილის“ თეორიაზე. მაგრამ ეს თეორია მუშაობს დახურულ, ტოტალიტარულ პოლიტიკურ სისტემებში. ხოლო შეერთებულ შტატებში წამყვანი მედია-ჰოლდინგები მხარს უჭერენ კამალა ჰარისს. ამიტომ, ტრამპის სიცრუის გამოვლენა დემოკრატების თავდასხმის მთავარ ხაზად იქცა. კამალა ჰარისის გარდა, დონალდ ტრამპის ტყუილი უარყო აშშ-ს პრეზიდენტმა ჯო ბაიდენმა. ასევე ყოფილი პრეზიდენტი ბარაკ ობამა გამოვიდა სიტყვით, რომელშიც დასცინოდა ტრამპის შეთქმულების თეორიებს.
CNN-მა გამოაქვეყნა სტატია, რომელშიც შეაგროვა დონალდ ტრამპის 40 ცრუ განცხადება, რომელიც მან ორი აქციის დროს გააკეთა. https://edition.cnn.com/2024/10/10/politics/fact-check-trump-pennsylvania-speeches/index.html
მაგალითად, ტრამპი ამტკიცებდა, რომ FEMA, საგანგებო სიტუაციების სამინისტროს ამერიკული ეკვივალენტი, დარჩა ფულის გარეშე, რადგან ის დარიგდა არალეგალურ მიგრანტებზე. CNN-ის ცნობით, სტატიის გამოქვეყნების დროს FEMA-ს ჰქონდა 11 მილიარდი დოლარი საგანგებო სიტუაციებზე რეაგირების ფონდში.
ტრამპმა ასევე განაცხადა, რომ პატიმრების რაოდენობა მთელს მსოფლიოში მცირდება, რადგან ისინი ამერიკაში არალეგალურად მიჰყავთ. სინამდვილეში, მსოფლიოში პატიმართა რიცხვი იზრდება.
ტრამპი ამტკიცებდა, რომ ვენესუელაში ადგილობრივი პოლიცია კრიმინალებს აგროვებს და შემდეგ ავტობუსით აგზავნის მექსიკა-ამერიკის საზღვარზე.
ტრამპის მხარდამჭერები ასევე მონაწილეობენ შეთქმულების თეორიების გავრცელებაში. მაგალითად, ცნობილმა ტრამპისტმა მარჯორი ტეილორ გრინმა თქვა, რომ ბაიდენის ადმინისტრაცია აკონტროლებს ამინდს და სპეციალურად არჩევნების წინ მოახდინა ქარიშხლის პროვოცირება.
ყალბმა ამბებმა შეიძლება მოკლევადიანი გავლენა მოახდინოს აუდიტორიაზე. მაგრამ სიყალბის გამოვლენა დიდი ხანია გახდა მედიისთვის ერთ-ერთი მნიშვნელოვანი თემა. დემოკრატები ასევე ამტკიცებენ, რომ ტრამპის მიზანმიმართული დეზინფორმაცია სტიქიური უბედურების დროს იწვევს პანიკას და იმ ადამიანების გაღიზიანებას, რომლებსაც მიადგათ ზიანი ქარიშხლის დროს.
აღსანიშნავია ჯო ბაიდენის აქტიურობა კამალა ჰარისის საარჩევნო კამპანიაში. 13 ოქტომბერს ბაიდენი ეწვევა ფლორიდის შტატს, რათა პირადად გაეცნოს ქარიშხლის შედეგებს და გადაწყვიტოს რა დამატებითი ზომების მიღებაა საჭირო. კამალა ჰარისი ყავს ჩართული ყველა საგანგებო შეხვედრებში, რომელსაც ჯო ბაიდენი იწვევს ქარიშხლის შედეგებთან დაკავშირებით.
როგორც გვაცნობს ტელეარხი ABC, ბაიდენმა კონგრესში რესპუბლიკური ფრაქციის წინააღმდეგ შეტევაც დაიწყო. მან თქვა, რომ ზოგიერთ რესპუბლიკელთან ისაუბრა დამატებითი დაფინანსების აუცილებლობის შესახებ, რათა დაეხმაროს მცირე ბიზნესს ქარიშხლის ზარალთან გამკლავებაში. ბაიდენმა პალატის სპიკერს მაიკ ჯონსონს მოუწოდა, დააბრუნოს კონგრესმენები ვაშინგტონში, რათა მიიღონ საჭირო გადაწყვეტილებები.
https://abcnews.go.com/Politics/biden-visit-florida-after-hurricane-milton-calls-johnson/story?id=114725792 ბაიდენის ეს ნაბიჯი არის დახმარება კამალა ჰარისისთვის, რომელიც ცდილობს დაეყრდნოს ამერიკელ საშუალო ფენას.
ქარიშხალი მილტონი ჯერ მძვინვარებს. მაგრამ მან უკვე მოახდინა გავლენა საარჩევნო კამპანიის სცენარზე და მისმა პოლიტიკურმა შედეგებმა შეიძლება გადამწყვეტი როლი ითამაშოს 5 ნოემბრის არჩევნების შედეგებში.
ავთანდილ წულაძე, პოლიტოლოგიის დოქტორი
