პრეზიდენტის განცხადებით, მისი მოგზაურობების მიზანია, ხელი შეუწყოს საქართველოს ევროინტეგრაციის თვალსაზრისით. რეალურად, ეს სრულიად კონტრპროდუქტიულია, – ამის შესახებ ადამიანის უფლებებისა და სამოქალაქო ინტეგრაციის კომიტეტის თავმჯდომარემ, მიხეილ სარჯველაძემ განაცხადა.
მისივე თქმით, გაუჭირდება თქმა, პრეზიდენტი ამას შეგნებულად აკეთებს თუ გაუაზრებლად.
„საზოგადოებამ შეაფასოს, თუ ვინმე მიიჩნევს საქართველოში ან სადმე სხვაგან, რომ საქართველოს ევროინტეგრაციასთან დაკავშირებით საქართველომ უნდა დააფიქსიროს პოზიცია, თითქოს ქვეყანა კანდიდატის სტატუსს არ იმსახურებს. პირადად მე, ნამდვილად არ მგონია, რომ კანდიდატის სტატუსის მოპოვებას დაეხმარება ასეთი განცხადებების კეთება, რომ საქართველოში რუსული გადაწყვეტილებები მიიღება ან ჩვენი ქვეყანა კანდიდატის სტატუსს არ იმსახურებს.
საქართველოს კონსტიტუცია ადგენს და განსაზღვრავს, რომ საქართველოს პრეზიდენტი არ გახლავთ უფლებამოსილი, დამოუკიდებლად იმოქმედოს საგარეო პოლიტიკურ ურთიერთობებში და მას ასეთი წარმომადგენლობის განსახორციელებლად მთავრობის თანხმობა ესაჭიროება. ცივილიზებულ სახელმწიფოში ყველა უნდა ახერხებდეს, საკუთარი ქმედებები ისე დაგეგმოს, რომ ეს თავსებადი იყოს საქართველოს კონსტიტუციასთან. თუ კი ამას ვინმე ვერ ახერხებს, ეს არ ნიშნავს, რომ კონსტიტუციის ან სხვისი პრობლემაა. ეს მისივე პრობლემაა“, – განაცხადა მიხეილ სარჯველაძემ.
