„პრეზიდენტის შანტაჟის ამ ამაზრზენ ფორმაზე თუ რეაქცია იქნება, რომ შეიწყალებს [სააკაშვილს], მაშინ ყველას ეცოდინება, რომ საქართველოს ჰყავს პრეზიდენტი, რომელიც ერთის მხრივ არღვევს კონსტიტუციას, მეორე მხრივ, ექვემდებარება შანტაჟს,“ – ასე უპასუხა პარტია „ქართული ოცნების“ აღმასრულებელმა მდივანმა, ფრაქცია „ქართული ოცნების“ თავმჯდომარემ მამუკა მდინარაძემ გადაცემაში „იმედი Live“ კითხვას, რას ფიქრობს იმ ფარულ მოლაპარაკებებზე, რომელიც მიმდინარეობს იმასთან დაკავშირებით, რომ თუ სალომე ზურაბიშვილი არ გაათავისუფლებს სააკაშვილს, „ნაცმოძრაობა“ შევა დარბაზში და მხარს დაუჭერს მის იმპიჩმენტს.
„თავიდან რომ მალავდნენ გახსოვთ? უარყოფდნენ. განიხილავენ ამას, დღეს სტატუსებიც შემომხვდა „ფეისბუქზე“ – ან სააკაშვილის შეწყალება, ან იმპიჩმენტი. პრეზიდენტის შანტაჟის ამ ამაზრზენ ფორმაზე თუ რეაქცია იქნება, რომ შეიწყალებს [სააკაშვილს], მაშინ ყველას ეცოდინება, რომ საქართველოს ჰყავს პრეზიდენტი, რომელიც ერთის მხრივ არღვევს კონსტიტუციას, მეორე მხრივ, ექვემდებარება შანტაჟს და თავისი სკამის შესანარჩუნებლად იყენებს შეწყალების უფლებას ყველაზე სასტიკი დამნაშავის მიმართ. იმ დამნაშავის მიმართ, რომელმაც შექმნა წამების, გაუპატიურების, ბიზნესის რეკეტის, ტელევიზიების ჩამორთმევის, ადამიანების მოკვლის სისტემა. ავტოკრატიული – ყველაზე რბილი შეფასებაა ალბათ. ამ ადამიანს იწყალებს მხოლოდ და მხოლოდ იმის გამო, რომ უფრთხილდება საკუთარ სკამს. მას ალბათ მორალური უფლება არც ისე აღარ აქვს და აღარც ექნება არანაირი უფლება, რომ პრეზიდენტის სავარძელში იჯდეს როცა ამ სავარძლისთვის იწყალებს ვიღაცას“, – აღნიშნა მდინარაძემ.
კითხვაზე, რას უპასუხებს ოპონენტების განცხადებებს, რომ „ქართული ოცნება“ აპირებს ვიღაცების გადაბირებას, რათა პრეზიდენტის იმპიჩმენტისთვის საკმარისი ხმები მოგროვდეს, მდინარაძე აცხადებს, რომ ეს ყველაფერი სიცრუეა.
„ყველა იტყუება. მთელი პასუხისმგებლობით შემიძლია გითხრათ, რომ თუ რომელიმე მათგანი ამბობს, რომ „ქართული ოცნებიდან“ ვინმე ცდილობს მათ დარწმუნებას, რომ მხარი დაუჭირონ იმპიჩმენტს, და კულისებში რაღაც ხდება და იქ ვაპირებთ ან ვინმეს ველაპარაკებით, ეს არის ცალსახა ტყუილი და ამას მთელი პასუხისმგებლობით ვამბობ“, – აღნიშნა მდინარაძემ.
