სერბეთის პრეზიდენტის ალექსანდრ ვუჩიჩის განცხადებით, რუსეთის პრეზიდენტ ვლადიმერ პუტინს პირობა მისცა, რომ მეორე მსოფლიო ომში გამარჯვების 80 წლისთავზე მოსკოვში ჩავიდოდა და პირობა შეასრულა.
„იცით, მე პრეზიდენტ პუტინს მივეცი სიტყვა, რომ დღეს აქ ვიქნებოდი და მე შევასრულე, რაც ვთქვი. ვფიქრობ, ეს ძალიან მნიშვნელოვანია ჩვენთვის“, – აღნიშნა ვუჩიჩმა.
სერბეთის პრეზიდენტმა განმარტა, რამდენად მნიშვნელოვანია ბელგრადისთვის პუტინთან მოლაპარაკებები და ორმხრივი ურთიერთობების განვითარება.
„ჩვენ გვაქვს დიდი ამოცანა, შევინარჩუნოთ ხსოვნა დიდი სამამულო ომის შესახებ, გამარჯვების შესახებ. მე ვამაყობ სერბი ხალხის როლით ამ გამარჯვებაში. მადლობა თქვენ თბილი მიღებისთვის, თქვენი სტუმართმოყვარეობისთვის“, – აღნიშნა ვუჩიჩმა.
მანამდე ევროკავშირის მაღალჩინოსნებმა გააფრთხილეს სერბეთის პრეზიდეტი, რომ მოსკოვში ვიზიტი ხელს შეუშლის ქვეყნის ევროკავშირში გაწევრიანებას. სერბეთი ევროკავშირის წევრობის კანდიდატი ქვეყანაა. თავად ვუჩიჩმა აღნიშნა, რომ მოსკოვში ვიზიტის გამო მისი ქვეყნის ევროპულ გზას საფრთხე არ ემუქრება.
