ფოთში სტიქიის სალიკვიდაციო სამუშაოები უწყვეტ რეჟიმში გრძელდება. ძლიერმა შტორმმა სანაპირო ზოლი და ინფრასტრუქტურა დააზიანა.
ადგილობრივი ხელისუფლების ინფორმაციით, მერიის შესაბამისი სამსახურები სრულად არიან მობილიზებულები და საგანგებო რეჟიმში ახორციელებენ შესაბამის სამუშაოებს. სანაპირო ზოლზე მუშაობს მძიმე ტექნიკა. პრობლემურ ადგილებზე ეწყობა ე.წ. ტეტრაბოტები.
ძლიერმა ქარმა, ასევე, დააზიანა მრავალბინიანი კორპუსის სახურავიც, სადაც უკვე მოხდა დროებითი გადახურვის მონტაჟი.
„ამინდის გაუმჯობესებისთანავე აქტიურად განხორციელდება სხვა სალიკვიდაციო სამუშაოები. მადლობა ყველა კომპანიას, რომლებიც მერიის სამსახურებთან ერთად ჩართული არიან სტიქიასთან ბრძოლის პროცესში“, – ნათქვამია ფოთის მერიის მიერ გავრცელებულ განცხადებაში.
