„ორნიშნა ეკონომიკა და წარმატება კი არა, ფიზიკურად ისე დავიცალეთ, უსისხლო ქვეყანა გავხდით და ერის განადგურების წინაშე ვდგავართ“, – ამის შესახებ პოლიტიკური მოძრაობა „ტრიბუნას“ ლიდერი, დავით ჭიჭინაძე აცხადებს. როგორც ის აღნიშნავს, ბოლო ერთ წელიწადში საქართველოში გაცილებით მეტი რუსი შემოვიდა, ვიდრე ქართველი დაიბადა.
„ჯერჯერობით შემოსულია 100 ათასზე მეტი ადამიანი ჩრდილოეთ სამეზობლოდან, რასაც მათი 2 მილიარდზე მეტი გადმორიცხვა მოყვა.
სანამ ესენი შემოდიან და ყიდულობენ ტერიტორიებს, საქართველოში, ერთ წელიწადში მხოლოდ 41 ათასი ადამიანი დაიბადა, რაც ისტორიულად კატასტროფული მინიმუმია! 49 ათასი კი გარდაიცვალა.
ამას დავუმატოთ ემიგრაციაში წასული ათიათასობით ქართველი და სულ მალე დავდგებით ფაქტის წინაშე, როდესაც ქართველი აღარ დაიბადება ქვეყანაში.
აი ასეთ რეალობაში გვესაუბრება ღარიბაშვილი ორნიშნა ეკონომიკურ ზრდაზე და აყვავებულ ცხოვრებაზე.
სინამდვილეში კი ამათ აშკარად გეგმა აქვთ მოსახლეობის ნახევარზე მეტი გაუშვან სამშობლოდან, შობადობა ისედაც შემცირებულია და დარჩენილებზე კიდე იმხელა შემოსავალი ექნებათ, გამოდგებიან მერე და იყვირებენ შვეიცარია ვართო”,– აცხადებს დავით ჭიჭინაძე.
