მმართველ გუნდში ვერ აკონკრეტებენ, პარლამენტის საგაზაფხულო სესიის გახსნისას, დღის წესრიგში დადგება თუ არა პარლამენტის იმ წევრებისთვის სადეპუტატო უფლებამოსილების შეწყვეტის საკითხი, რომლებმაც შესაბამისი განცხადებებით XI მოწვევის პარლამენტს, შეკრებისთანავე – ნოემბრის თვეში მიმართეს.
როგორც ამ თემაზე “ინტერპრესნიუსს“ საპროცედურო საკითხთა და წესების კომიტეტის თავმჯდომარემ დავით მათიკაშვილმა განუცხადა, “აღნიშნულ საკითხზე პარლამენტი მაშინ იმსჯელებს, როცა საჭიროდ ჩათვლის“. დამატებითი განმარტების გაკეთებისგან დავით მათიკაშვილმა თავი შეიკავა.
პარლამენტს მანდატების გაუქმების მოთხოვნით სამი პოლიტიკური სუბიექტის: – “კოალიცია ცვლილებებისთვის”, “ძლიერი საქართველოსა“ და “ერთიანობა – ნაციონალურ მოძრაობის“ წარმომადგენლებმა ნოემბერში მიმართეს.
დეპუტატის პირადი განცხადების საფუძველზე უფლებამოსილების შეწყვეტის საკითხის განხილვის და გადაწყვეტილების მიღების ვადებს თავად კანონი ადგენს – რეგლამენტის მიხედვით, მას შემდეგ რაც პარლამენტის თავმჯდომარეს უფლებამოსილების მოხსნის თაობაზე წერილობითი განცხადება წარედგინება, ის ამ განცხადებას დაუყოვნებლივ საპროცედურო საკითხთა კომიტეტს გადასცემს, ხოლო კომიტეტი არაუადრეს 8 და არაუგვიანეს 15 დღისა შესაბამის დასკვნას ამზადებს. ამის შემდეგ საკითხი გადაწყვეტილების მისაღებად უახლოესს პლენარულ სხდომაზე უნდა გავიდეს და პარლამენტი ვალდებულია უფლებამოსილების ვადამდე შეწყვეტის საკითხი დაუყოვნებლივ განიხილოს.
აღსანიშნავია, რომ პარლამენტმა დეკემბრის თვეში სადეპუტატო უფლებამოსილება “ქართული ოცნების“ რამდენიმე წარმომადგენელს შეუწყვიტა. მათ შორის პირადი განცხადების საფუძველზე უფლებამოსილება ბიძინა ივანიშვილს, ირაკლი ღარიბაშვილს და მიხეილ ყაველაშვილს შეუწყდათ, თუმცა ოპოზიციის განცხადებები განხილვის საგანი არ გამხდარა.
ცნობისთვის, ბარიერგადალახული ოპოზიციური გაერთიანებები 26 ოქტომბრის საპარლამენტო არჩევნებს გაყალბებულად და არალეგიტიმურად აცხადებენ და საპარლამენტო საქმიანობაში ჩართვას არ აპირებენ. პარლამენტის გარდა, მათ ასევე მიმართეს ცესკოს ე.წ. სათადარიგო-საარჩევნო სიების გაუქმების მოთხოვნით, რა მოთხოვნაც ცენტრალურმა საარჩევნო კომისიამ დააკმაყოფილა.
მსგავსი მიმართვა პარტიას “გახარია – საქართველოსთვის“ არ გაუკეთებია.
