უკრაინის პრეზიდენტმა, ვოლოდიმირ ზელენსკიმ კომენტარი გააკეთა აშშ-ის არჩეული პრეზიდენტის, დონალდ ტრამპის დაპირებაზე, რომ უკრაინაში ომს 24 საათში დაასრულებს. ინფორმაციას ამის შესახებ უკრაინული მედია ავრცელებს.
„დარწმუნებული ვარ, ომის სწრაფად დასრულება დანაკარგებს ნიშნავს. თუ ეს უბრალოდ სწრაფად მოხდება, ეს უკრაინისთვის დანაკარგები იქნება. უბრალოდ ჯერ არ მესმის სხვაგვარად როგორ უნდა მოხდეს ეს. შეიძლება რაღაც არ ვიცით, რაღაცას ვერ ვხედავთ. ასე ხდება. ცოტა დრო გვჭირდება“, – აღნიშნა ვოლოდიმირ ზელენსკიმ.
მისი თქმით, მას ტრამპთან ამის შესახებ ჯერ არ უსაუბრია, თუმცა მოგვიანებით მოისმენს ტრამპის მხრიდან შესაბამის წინადადებებს.
„ერთი რამ ჩემთვის ნათელია, მას ნამდვილად სურს [ომის] დასრულება“, – დასძინა მან
მისი თქმით, ცეცხლის შეწყვეტა უკრაინისთვის უსაფრთხოების გარანტიების უზრუნველყოფის გარეშე არის მოდელი, რომლის შესახებაც საუბრობს ზოგიერთი ევროპელი ლიდერი, ბრაზილია, ჩინეთი და, რა თქმა უნდა, რუსეთი.
„ეს შესანიშნავი მოდელია რუსეთის ფედერაციისთვის. ჯერ ცეცხლის შეწყვეტა და მერე სხვა რამ. უნდა გავიგოთ, რა არის „სხვა რამ“?“ – აღნიშნა ზელენსკიმ.
