თურქეთის პრეზიდენტის რეჯეფ თაიფ ერდოღანის განცხადებით, ისრაელის პრემიერი ნეთანიაჰუ ისტორიაში შევა როგორც „ღაზას ყასაბი“ ღაზაში მის მიერ ჩადენილი ერთ-ერთი უდიდესი სისასტიკის გამო.
„თურქეთი გააგრძელებს მცდელობებს, რათა საერთაშორისო სასამართლოებში პასუხი აგებინოს ისრაელის ხელისუფლებას იმ დანაშაულებისთვის, რომლებიც ბენიამინ ნეთანიაჰუს ხელისუფლებამ ღაზას სექტორში ჩაიდინა“, – აღნიშნა ერდოღანმა.
თურქეთის პრეზიდენტმა ისრაელის ქმედებები ღაზაში გენოციდად შეაფასა.
ერდოღანმა დასძინა, რომ ნეთანიაჰუს ქმედებებმა გააძლიერა ანტისემიტიზმი და საფრთხე შეუქმნა ებრაელების სიცოცხლეს მთელს მსოფლიოში.
„მათ გაანადგურეს ღაზა და ჩაიდინეს სისასტიკე. 50 დღის განმავლობაში წვავდნენ და ანადგურებდნენ ღაზას. ჩემი ღაზელი ძმები კაცობრიობის ისტორიაში ყველაზე ვერაგული თავდასხმის მსხვერპლები გახდნენ. ისრაელელმა სამხედროებმა გენოციდი მოაწყვეს, ისინი წვავდნენ და ანადგურებდნენ ადამიანებს მთელი კაცობრიობის თვალწინ. 2,3 მილიონი ადამიანის წინააღმდეგ გენოციდი განხორციელდა. ნეთანიაჰუ, რომელმაც ეს ჩაიდინა, უკვე შევიდა ისტორიაში როგორც ღაზის ყასაბი“, – დასძინა ერდოღანმა.
