ჩვენთვის პრიორიტეტულია, რომ საქართველოს დღის წესრიგში მდგარი ამოცანები იყოს კარგად ცნობილი კოლეგებისთვის, რომ საქართველო იბრძვის ქვეყანაში და რეგიონში სტაბილურობისთვის, უსაფრთხოებისთვის, – ამის შესახებ საგარეო საქმეთა მინისტრმა, მაკა ბოჭორშვილმა დუბროვნიკის ყოველწლიური ფორუმის ფარგლებში განაცხადა.
მისი თქმით, მნიშვნელოვანია, რომ პარტნიორებმა კარგად გააცნობიერონ, რა გამოწვევების წინაშე დგას ქვეყანა.
„დუბროვნიკის ფორუმი კარგი შესაძლებლობაა, რომ მქონდეს კომუნიკაცია ჩემს კოლეგებთან. მქონდა რამდენიმე შეხვედრა, კიდევ მაქვს დაგეგმილი შეხვედრები საგარეო საქმეთა მინისტრებთან. მნიშვნელოვანია, რომ საქართველოს პოზიციები იყოს გაზიარებული, საქართველოსთან დაკავშირებულ საკითხებზე გვქონდეს მსჯელობა. ჩვენთვის პრიორიტეტულია, რომ საქართველოს დღის წესრიგში მდგარი ამოცანები იყოს კარგად ცნობილი კოლეგებისთვის, რომ საქართველო იბრძვის ქვეყანაში და რეგიონში სტაბილურობისთვის, უსაფრთხოებისთვის. მნიშვნელოვანია, რომ პარტნიორებმა კარგად გააცნობიერონ, თუ რა გამოწვევების წინაშე დგას ქვეყანა. ასევე განხილვების დროს ჩვენ შესაძლებლობა გვექნება, ვისაუბროთ იმ როლზე, რაც საქართველოს აქვს რეგიონში ევროპისა და აზიის დაკავშირებადობის თვალსაზრისით. ეს არის ერთ-ერთი აქტუალური საკითხი, რომელიც დღეს განიხილება სწორედ ამ ფორუმის ფარგლებში და მნიშვნელოვანია, რომ საქართველომ, როგორც შუა დერეფნის ერთ-ერთმა ქვეყანამ, რომელსაც აქვს დიდი პოტენციალი, ითამაშოს მნიშვნელოვანი როლი. სწორედ ამ მიმართულებით არის ჩვენი ქვეყანა მოწვეული და გვექნება შესაძლებლობა, წარმოვაჩინოთ ჩვენი შესაძლებლობები და პრიორიტეტები“, – განაცხადა მაკა ბოჭორიშვილმა.
