მიზანი გვქონდა, ყველასთვის გვეთქვა, რომ პრეზიდენტმა დაარღვია კონსტიტუცია – ჩვენი ამოცანა არასდროს ყოფილა იმპიჩმენტი, – ამის შესახებ საპარლამენტო უმრავლესობის წევრმა ირაკლი ზარქუამ განაცხადა.
მისი თქმით, უმრავლესობას მოლოდინი არ აქვს, რომ პარლამენტში ოპოზიცია იმპიჩმენტს მხარს დაუჭერს.
„მთელმა საქართველომ, უმრავლესობამ, ოპოზიციამ და თვითონ პრეზიდენტმაც იცის, რომ მან კონსტიტუცია დაარღვია. იმ სამი დღის განმავლობაში კობახიძე ლექციას უტარებდა პრეზიდენტის წარმომადგენლებს ანაბანაზე საკმაოდ შთამბეჭდავად, მგონი მოსამართლეებიც დარწმუნდნენ, რომ კონსტიტუცია იქნა დარღვეული და დღეს იქნება გადაწყვეტილება გამოცხადებული. არ აქვს მნიშვნელობა სტატუსს, ვინ ხარ, თუ დაარღვევ კონსტიტუციას, ამაზე იქნება მსჯელობა და შესაბამისი გადაწყვეტილებები. ჩვენ მიზანი გვქონდა, ყველასთვის გვეთქვა, რომ პრეზიდენტმა დაარღვია კონსტიტუცია და მან ეს უნდა იცოდეს. ის რადიკალები, ვინც ქალბატონ სალომეს მოღალატეს, რუსეთის აგენტს, ჩანერგილს ეძახდნენ, დღეს მის დამცველად მოგვევლინა, რადგან იმ ქაოსში ეტყობა ეწერება მისი გააზრებული თუ გაუაზრებელი განცხადებები, მათ შორის სტატუსზე. ორჯერ თქვა საჯაროდ, რომ ეს ხალხი არ იმსახურებს – არაფერს აკეთებენ, მაგრამ მაინც უნდა მისცეთო. ასეთ განცხადებას რომ აკეთებ პრეზიდენტი, როცა მიზანი გაქვს ქვეყანა ევროინტეგრაციის გზაზე წინ წასწიო, ხომ არაადეკვატურობაა?! ამიტომ ეს ნარატივი ჯდება რადიკალების გეგმებში, რომელსაც არეულობა უნდათ, ასეთებისგან მხარდაჭერა არ ექნება ბუნებრივია, იმპიჩმენტს. ჩვენი ამოცანა არასდროს ყოფილა იმპიჩმენტი, ჩვენ ვთქვით, რომ ვინც დაადგინა კონსტიტუცია, ჩვენ უნდა დავადგინოთ და ოქმის სახით იქნას ეს დადებული,”- განაცხადა ზარქუამ.
შეგახსენებთ, რომ საკონსტიტუციო სასამართლო პრეზიდენტის საიმპიჩმენტო წარდგინებაზე დასკვნას დღეს გამოაცხადებს.
საკონსტიტუციო სასამართლომ „ქართული ოცნების” ავტორობით მომზადებული წარდგინება ოქტომბრის დასაწყისში განიხილა. განხილვა 3 დღის განმავლობაში მიმდინარეობდა.
