“მე კითხვები მაქვს, 9 ტყვია რატომ მომხვდა, როდესაც მშვიდობიანი პროტესტანტი ვიყავი და ამის გამო დაზარალებულის სტატუსიც მაქვს”, – ასე გამოეხმაურა პარტია “ერთიანობა-ნაციონალური მოძრაობის” წევრი, ირაკლი ფავლენიშვილი 20-21 წლის მოვლენებზე საგამოძიებო მოქმედებების დაწყებას.
მისივე თქმით, ახლა ამ გამოძიების დაწყება “ქართული ოცნების” პირადი ინტერესებიდან გამომდინარე მოხდა.
“იყო უბრალოდ ბრუტალური თავდასხმა, დასახიჩრება, გამიზნული სპეცოპერაცია საათების განმავლობაში. ახლა ამ ყველაფრის გაკეთება, რა თქმა უნდა, არის პირადი ინტერესებიდან გამომდინარე. შეიძლება, გახარიაზე აპირებენ ჯოხის გადატეხას მხოლოდ და მხოლოდ. იმდენად კომპლექსური დანაშაული იყო, რომ ძალიან ბევრი დამნაშავე არის,” – აცხადებს ირაკლი ფავლენიშვილი.
ცნობისთვის, საქართველოს სახელმწიფომ ადამიანის უფლებათა ევროპული სასამართლოსგან მიღებული რეკომენდაციის შესრულება დაიწყო. ხელახალმა გამოძიებამ პასუხები უნდა გასცეს კითხვებს 6 წლის წინ მომხდარ ფაქტებთან დაკავშირებით. რამდენად სწორად დაიგეგმა 20 ივნისს აქციის შეწყვეტის ოპერაცია და შეიძლებოდა თუ არა ზიანის შემცირება, ჰქონდა თუ არა შინაგან საქმეთა სამინისტროს მხრიდან ძალის გადამეტებას ადგილი და ვინ არიან შესაძლო დანაშაულის ჩამდენი პირები.
