ვეტერანების საქმეთა სახელმწიფო სამსახურის დირექტორი, გენერალ-მაიორი კობა კობალაძე, ოფიციალური ვიზიტით ამერიკის შეერთებულ შტატებში იმყოფება. ვიზიტის ფარგლებში, მან პირველი შეხვედრა გამართა აშშ-ში საქართველოს ელჩის მოვალეობის შემსრულებელ, ხათუნა კვესილავასთან და საქართველოს სამხედრო ატაშესთან, იროდი ქადაგიშვილთან.
შეხვედრაზე განიხილეს ვიზიტის ფარგლებში დაგეგმილი შეხვედრები, რომელთაც ვეტერანების საქმეთა სახელმწიფო სამსახურის დელეგაცია გამართავს. კობა კობალაძის განცხადებით, ვიზიტის მიზანია საქართველოში ვეტერანებისთვის სხვადასხვა სოციალური და ჯანდაცვის პროგრამების დანერგვა და განხორციელება.
განსაკუთრებული მნიშვნელობა ენიჭება ამერიკის შეერთებული შტატების შესაბამისი სახელმწიფო სტრუქტურებისა და არასამთავრობო სექტორის გამოცდილების გაზიარებას და ერთობლივი პროექტების შემუშავებას, რაც გააუმჯობესებს ქართველი ვეტერანების ფსიქო-სოციალურ მდგომარეობას.
შეხვედრას, ასევე, ესწრებოდნენ ვეტერანების საქმეთა სახელმწიფო სამსახურის იურიდიული დეპარტამენტის უფროსი ირაკლი ჭანტურიძე და პროტოკოლის განყოფილების უფროსი მარიამ ადამაშვილი, აშშ-ში საქართველოს სამხედრო ატაშის მოადგილეები, გიორგი დუმბაძე და რომან სანიკიძე. სამსახურის დირექტორი ვიზიტის ფარგლებში კიდევ რამდენიმე შეხვედრას გამართავს.
