კამალა ჰარისი აშშ-ის „დემოკრატიული“ პარტიის პრეზიდენტობის ოფიციალური კანდიდატი გახდა. ეს პარტიის ყრილობაზე გახდა ცნობილი, რომელიც უკვე მეორე დღეა ჩიკაგოში მიმდინარეობს.
ჰარისმა ყრილობის მონაწილეებს სიტყვით მიმართა და აღნიშნა, რომ პარტიის დელეგატებმა მხარი დაუჭირეს მას და მისი კამპანიის ვიცე-პრეზიდენტობის კანდიდატ ტიმ უოლცს.
„ჩვენთვის დიდი პატივია, ვიყოთ თქვენი კანდიდატები“, – განაცხადა ჰარისმა.
ყრილობაზე დღეს სიტყვით აშშ-ის ყოფილი პრეზიდენტი ბარაკ ობამა და მისი მეუღლე მიშელიც გამოვიდნენ. ბარაკ ობამამ აღნიშნა, რომ აშშ „ჰარისის პრეზიდენტობისთვის მზად არის“, ყოფილმა პირველმა ლედიმ კი განაცხადა, რომ „იმედი ბრუნდება“.
ყრილობა ჩიკაგოში საპროტესტო დემონსტრაციების ფონზე მიმდინარეობს.
