იტალიის სენატმა ჰოლოდომორი უკრაინული ერის გენოციდად აღიარა.
შესაბამისი რეზოლუცია იტალიის პარლამენტის ზედა პალატის ვებგვერდზე გამოქვეყნდა.
1932-1933 წლების ჰოლოდომორის უკრაინული ერის გენოციდად აღიარების თაობაზე რეზოლუციას 130-მა სენატორმა დაუჭირა მხარი, 4-მა თავი შეიკავა, ხოლო წინააღმდეგ არც ერთი არ წასულა.
რეზოლუციაში აღნიშნულია, რომ 1932-1933 წლებში სსრკ-მა იოსებ სტალინის მეთაურობით “მიზანმიმართულად გამოიწვია შიმშილი, რომელსაც მილიონობით სიკვდილი მოყვა, უმეტეს წილად გლეხებისა და მცირე მიწათმფლობელების”, უკრაინის სამოქალაქო მოსახლეობაში.
“ჰოლოდომორისა და უკრაინული ერის წინააღმდეგ საბჭოური დანაშაულების შესახებ ხსოვნა კიდევ უფრო დიდ მნიშვნელობას იღებს დღეს რუსული შეჭრისა და უკრაინული ეროვნული იდენტობის წაშლის მცდელობების ფონზე” ,- აღნიშნულია დოკუმენტში.
