„ბალტიის ქვეყნებს ალბათ დაავალეს, რომ უსამშობლოების საშუალებით ახალი დირექტივები გატარდეს, რათა აქაურ განულებულ აგენტურას პოლიტიკური საკენკი მისცენ“, – ამის შესახებ საპარლამენტო უმრავლესობის წევრმა, ირაკლი კირცხალიამ ბალტიისპირეთის ქვეყნებში სალომე ზურაბიშვილის ვიზიტთან დაკავშირებით პირველ არხს განუცხადა.
ამასთან, კირცხალიას თქმით, სირცხვილია, როცა ბალტიის ქვეყნები საქართველოს რუსეთის წინააღმდეგ გამოყენებას ცდილობენ.
„ბალტიის ქვეყნები უკრაინა-რუსეთის ომის შემდეგ ძალიან აქტიურები არიან – მოწოდებებით და ანტისამთავრობო აქციებზე გამოსვლებით გამოირჩევიან. სამწუხაროდ, ევროპარლამენტის სტრუქტურებში წამყვან პოზიციებზე არიან და სირცხვილია, როცა ეს ქვეყნები საქართველოს რუსეთის წინააღმდეგ გამოყენებას ცდილობენ. რუსეთის ასეთი რა შიში აქვთ, ნატოს წევრი ქვეყნები არიან. რა შიშიც არ უნდა ჰქონდეთ, მათი ქმედებები თუ განცხადებები რომელ მორალთან არის ახლოს? ამ ყველაფრის მერკანტილური მიზნებიც აშკარა და ნათელია. ომის შემდეგ ერთ-ერთი პირველი სავაჭრო პარტნიორები არიან რუსეთთან“, – აცხადებს კირცხალია.
