გერმანიაში რუსეთისთვის საიდუმლო ინფორმაციის გადაცემაში ბრალდებული ჩინოვნიკი დააკავეს.
ინფორმაციას BBC ავრცელებს.
მამაკაცის ვინაობა ჯერჯერობით არ საჯაროვდება.
ცნობილია მხოლოდ, რომ ის ბუნდესვერის იმ სტრუქტურაში მუშაობდა, რომელსაც სამხედრო აღჭურვილობასა და საინფორმაციო ტექნოლოგიებთან დაკავშირებული საკითხები ეხება. სავარაუდოდ, მამაკაცი საკუთარი ინიციატივით მივიდა ბერლინში, რუსეთის საელჩოში და ასევე რუსეთის საკონსულოში ქალაქ ბონში, სადაც თავისი მომსახურება შესთავაზა. გერმანიის ფედერალური პროკურატურის ინფორმაციით, მამაკაცმა ინფორმაცია რუსეთის დაზვერვის სამსახურისთვის მიწოდების მიზნით მოიპოვა და გადასცა. მამაკაცი დასავლეთ გერმანიაში კობლენცში დააკავეს. სამართალდამცავებმა მის სახლსა და სამსახურში ჩხრეკა ჩაატარეს.
