გერმანიაში ერითრეის კულტურის ფესტივალზე, პოლიციასა და ფესტივალის მოწინააღმდეგეებს შორის დაპირისპირება მოხდა.
პოლიციამ, მომიტინგეების წინააღმდეგ ხელკეტები და წიწაკის სპრეი გამოიყენა. ფესტივალზე მომხდარი შეტაკებების მონაწილე 100 პირი დაკავებულია.
მედიის ცნობით, არეულობის შედეგად 26 პოლიციელი დაიჭრა.
პოლიციის განცხადებაში ნათქვამია, რომ შეტაკება რამდენიმე საათს გაგრძელდა, მომიტინგეებმა ბოთლები და ქვები დაუშინეს პოლიციას, დააზიანეს რამდენიმე მანქანა და ზოგიერთმა მათგანმა დამცავი ჯებირები გაარღვია.
ცნობისთვის, ერითრეის კულტურის ფესტივალი გისენში 2011 წლიდან იმართება. ფესტივალის მოწინააღმდეგეები არიან ერითრეის მოქალაქეები, რომლებმაც სამშობლო დატოვეს და ქვეყნის ხელისუფლებას ავტორიტარიზმში ადანაშაულებენ.
მათი თქმით, ფესტივალს გერმანიაში ერითრეის მთავრობასთან დაახლოებული ორგანიზაცია მართავს და ის პროპაგანდის ინსტრუმენტს წარმოადგენს. ბოლო წლებში გერმანიამ თავშესაფარი მისცა ბევრ ერითრეელს.
