გამჭვირვალობის კანონი არ მომწონს არც საქართველოში, არც ამერიკაში, არც კანადაში და არც ევროპაში, ცუდი კანონია, – ამის შესახებ „გირჩის“ წევრმა, ჰერმან საბომ განაცხადა.
მისი თქმით, როგორც წესი, ცუდ კანონს აზღვევს წესიერი სასამართლო, რისთვისაც საჭიროა სასამართლო, რომელიც მთავრობას არ ექვემდებარება.
„გამჭვირვალობის კანონი არ მომწონს არც საქართველოში, არც ამერიკაში, არც კანადაში და არც ევროპაში. ცუდი კანონია, ზედმეტი ჩარევაა ადამიანების საზოგადოებრივ ცხოვრებაში. შენს ქვეყანაში რომელიმე უცხო ქვეყანა რაიმე სპეცოპერაციას თუ ახორციელებს, ამას სპეცსამსახურები უნდა უყურებდნენ და არა უცხოური აგენტების შესახებ რეესტრების შექმნა და რაღაც ნეგატიური კონოტაციის სახელების დარქმევა. მაგრამ რეალობა რომ გავითვალისწინოთ, ამ ცუდ კანონს, როგორც წესი, აზღვევს ხოლმე წესიერი სასამართლო, რომ მთავრობამ არ მოახდინოს ამ კანონის ბოროტად გამოყენება. ამისთვის საჭიროა წესიერი სასამართლო, რომელიც არ ექვემდებარება მთავრობას“, – განაცხადა ჰერმან საბომ.
მისი თქმით, კანადისგან განსხვავებით, საქართველოში ორმაგი პრობლემა არსებობს, თუ იქ ცუდ კანონს თეორიულად სასამართლო აზღვევს, საქართველოში სასამართლო ისევე კონტროლირებადია, როგორც სხვა ინსტიტუტები.
„ორმაგი პრობლემა გვაქვს, კანადელებისგან განსხვავებით. ცუდ კანონს იქ თუ თეორიულად სასამართლო აზღვევს, ჩვენთან სასამართლოც არ არის და სასამართლოც ისევე კონტროლირებადია, როგორც სხვა ინსტიტუტები. დასავლეთშიც, ევროპაში, ამერიკაში თუ კანადაში კანონი მიმართულია რუსეთის, ჩინეთისა და ირანის საწინააღმდეგოდ, ჩვენს შემთხვევაში ისე გამოვიდა, რომ ეს კანონი მივიღეთ ევროპის და ამერიკის საწინააღმდეგოდ. ამ სამი არგუმენტის გაერთიანება გვაძლევს იმ განსხვავებას კონტექსტში, რის გამოც კანადაში შეიძლება ნაკლები პრობლემა იყოს კანონის მიღებით, ვიდრე საქართველოში“, – განაცხადა ჰერმან საბომ.
